Plehrat dhe situata e rënduar me mbeturinat në Durrës ka marrë vëmendjen e ministrit të Brendshëm Bledi Çuçi gjatë konferencës së sotme për mediat.
Çuçi tha se e ka ndjekur situatën dhe se këto 2 ditë do të marrë një zgjidhje, por se problematika do të ekzistojë deri sa të bëhet një landfill model dhe në qytetin e Durrësit.
“Në lidhje me çështjen e depozitimit të mbeturinave, është një problem që në fakt ka ekzistuar dhe më përpara dhe agravohet vazhdimisht, sidomos për zonën e Durrësit, deri sa të bëhet një landfill model dhe aty. Unë e kam ndjekur situatën, edhe me kryetaren e bashkisë dhe është gjetur një zgjidhje për t’i çuar diku tjetër ato gjithë pjesën e mbeturinave të Durrësit. Besoj se këto 2 ditë do marrë një zgjidhje të shpejtë se ku do të depozitohen mbeturinat e Durrësit. Duhet të dini që kjo është një përgjegjësi përtej ministrit të Brendshëm, por disa institucioneve. Kam lehtësuar qarkullimin e mjeteve të rënda përtej qarkut të Durrësit për të mos pasur atë akumulim të mbeturinave”, tha ai.
