Ndryshe nga deputeti demokrat Ervin Salianji, ministri i Brendshëm, Bledi Çuçi e ka konsideruar sukses Operacionin Forca e Ligjit përgjatë funksionimit të tij në goditjen e pasurive të personave të inkriminuar.
Gjatë interpelancës në Kuvend, Çuçi iu përgjigj akuzave të Salianjit se OFL është përdorur për qëllime elektorale. Sipas ministrit, akuzat e Salianjit janë të pabaza sepse ligji për OFL-në është miratuar dy vite përpara zgjedhjeve të 2021-it.
“Dua të theksoj se e çmoj mundësinë për të folur për to, për të reflektuar. Është normale që të ndahemi politikisht se si duhet të forcojmë Policinë e Shtetit, duke hequr ata që nuk e meritojnë atë uniformë. Politika e ndasive si qëllim në vetvete, pa treguar një alternativë, i duhen lënë një kohe tjetër. Çfarë është OFL. OFL mbetet një moment historik i luftës së policisë kundër krimit, si një instrument efiçent dhe i shpejtë për të gjurmuar pasuritë e kriminelëve. Pavarësisht se zbatueshmëria mbaroi, rezultatet e OFL-së do i shtrijnë ndikimet edhe në të ardhmen. Nuk do ketë vakum dhe heshtje, pasi strukturat përkatëse, punojnë për identifikimin e pasurive të kriminelëve. BKH edhe pse ishte krijuar, nuk kishte nisur fillimin e hetimit të saj. Ky akt normativ i dha një shtysë të fuqishme luftës kundër krimit të organizuar, duke e goditur në pjesën që e fuqizon, tek pasuria. Akti normativ, kundrejt ligjit antimafia, e zgjeroi gamën e veprave penale ku policia mund të hetonte. Pretendimi juaj se OFL u përdor për qëllime elektorale, është i pambështetur. Është përgatitur në vitin 2019, dy vjet përpara zgjedhjeve. Është miratuar në vitin 2020 dhe ka pasur efekt vetëm një vit. Akti normativ, ka parashikuar kohën kur do veprohej. Nuk mund të mendosh se ishte një instrument për qëllime elektorale”, tha Çuçi.
Discussion about this post