Bledi Çuçi ka mbledhur Grupin Parlamentar të Partisë Socialiste, ku gjatë takimit është diskutuar për axhendën e kësaj jave në Kuvend.
Gjatë takimit me deputetët socialistë, Çuçi tha zbuluar se gjatë seancës parlamentare që do të zhvillohet ditën e enjte do të kalojnë për votim dy marrëveshje dhe dy projektligje.
“Së pari është marrëveshja në lidhje me programin e shkëmbimit të studimeve universitare në Evropën Qendrore dhe së dyti protokolli me Italinë për emigrantët”, tha kreu i Grupit të PS, duke shtuar se pritet zbardhja e plotë e vendimit të Gjykatës Kushtetuese këto ditë të para të javës, që i hap më pas rrugë për çuarjen në seancë.
Dy projektligjet që gjithashtu do kalojnë në votim janë amnistia penale dhe ai për Zonat e Mbrojtura, të cilat pritet të miratohen në seancën e kësaj jave.
“Projektligjin për Amnistinë Penale, Komisioni për Çështjet Ligjore parashikon për ta kaluar të martën. Do të rakordojmë dhe me opozitën për të bërë 84 votat e nevojshne për miratim”, deklaroi Çuçi.
Kreu i Grupit të PS kërkoi gjithashtu prezencë të deputetëve në seancë në mënyrë që projektligjet dhe marrëveshjet e parashikuara në rendin e ditës të miratohen.
Discussion about this post