Pas milionave që shpenzoi për dekoret e Vitit të Ri, kreu i Bashkisë Korçë, Sotiraq Filo mban gjallë atmosferën duke blerë zbukurime të tjera. Këtë herë ai do të shpenzojë 12.4 milionë lekë se do të stolisë qytetin për datën 9 Maj, Dita e Europës.
Eh, kjo festë do më shumë se 3 muaj vijë, as Europa vetë nuk i ka nisur organizimet qysh tani!
Epo, një gjë dihet me siguri: kryebashkiakët shpikin tenderë nga më të çuditshmit dhe ky prokurim i Sotiraq Filos futen në listën e çudirave.
Tenderi i parë ka si objekt “Shpenzime dekori (Projekti : 9 maj dita e Europës)” dhe realisht është një tender i vogël me vlerë 830 mijë lekë. Por, nuk është edhe aq e vogël si vlerë po të merret parasysh se çfarë dekorimesh do të blejë Filo me këto para.
Me siguri ndonjë shirit, sepse për dekoret e tjera ka hapur tenderë të veçantë. Gjithsesi mbetet të shohim kur të zhvillohet projekti se deri më tani janë paraqitur të dhëna të cunguara nga ana e Autoritetit Kontraktor.
Ndërsa tenderi tjetër ka si objekt “Shërbime të printimit (ftesa f-pal, baner, city light, kartolina, albume)”. Për të blerë kartolina dhe ftesa për këtë event, Filo ka menduar të shpenzojë edhe 9.3 milionë lekë të tjera. Këtu e paska lëshuar dorën kryetari!
Ndërsa logjika të bën të kuptosh që edhe këto blerje do t’i bëjë për Ditën e Europës.
Ndërsa sot (e premte 19 janar 2024) Filo ka hapur një tjetër tender me objekt “Fushata ndërgjegjësimi (Projekti Aktivitet promovues në ambientet e Kopshteve Komunitare)” dhe fond limit 1,3 milionë lekë.
Me sa duket Filo po mendon të bëjë fushata sensibilizuese në këto kopshte që te prodhojnë e kujdesen për perimet njësoj siç bëjnë në Europë. Pritet që për Ditën e Europës bashkia të bëjë edhe ndonjë reklamë me fruta e perime. Sepse vetë projekti ka si qëllim promovimin e Kopshteve Komunitare.
Dhe tenderi i fundi ka si objekt “Marrje me qira foni ndriçim aksesore (Projektet Panairi i talenteve te reja, Aktivitet promovues në ambientet e Kopshteve Komunitare)” me vlerë 1.1 milionë lekë.
Sigurisht edhe këto mikrofona e aksesorë ndriçimi kryetari do t’i marrë me qira për promovimin dhe aktivitet e sipërpërmendura. Ndërkohë, qytetarët në Korçë kanë shumë shqetësime të tjera, ndërsa Bashkia nuk i ka në agjendë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post