Pjerin Pashkja është drejtuar në redaksinë e emisionit “Stop”, sepse ka ndërtuar shtëpinë që në vitin 2000 dhe ka aplikuar për legalizimin e saj në vitin 2006.
Ngjitur ka shtëpinë vajza e tij. Në momentin e legalizimit, mori certifikatën vetëm për gjysmën e shtëpisë, ku përfshihej dhe ballkoni i së bijës. Pjerini thotë, se vetëdeklarimin e ka bërë në të njëjtën kohë për të gjithë shtëpinë.
“Jam Pjerin Pashkja, jetoj në Itali. Kam ndërtuar në vitin 2000 një shtëpi, ku nuk është legalizuar e gjitha, vetëm gjysma. Në krah të shtëpisë sime është shtëpia e vajzës, ku kanë legalizuar aneksin e shtëpisë së vajzës me shtëpinë time. Nuk kanë legalizuar gjysmën e shtëpisë sime dhe dyqanin që është një furrë buke poshtë”.
Iu drejtua Drejtorisë Vendore të ASHK Shkodër, ku i thanë se ishte bërë një gabim në sistem.
“Nuk ma legalizuan, më thanë që kemi bërë një gabim, ky ka hyrë në kompjuter, në sistem dhe nuk mundemi ta tërheqim më. E kanë bërë. Se pse? Kjo është punë e tyre”, u shpreh denoncuesi.
Pjerini jeton në Itali, pasi bën atje kimioterapi për një tumor.
“Është legalizuar gjysma. Unë kam bërë deklarimin e të gjithës. Vij vetëm për këtë punë. Çfarë më ka bërë Kadastra e Shkodrës, nuk ma ka bërë sëmundja ime tash e 10 vjet me kimioterapi me operacione. Kërkoj nga “Stop” thjesht drejtësinë me e vënë në vend”, u shpreh ai.
Pas Pjerinit, ASHK-së Shkodër iu drejtua gazetarja e “Stop”. Zv/drejtori Enderson Memcaj tha se do të çojë grup në terren për të zgjidhur problemin.
“Problemi qëndron sepse pranë ASHK Shkodër ka pasur disa ndryshime, duke filluar nga drejtuesi i institucionit, zv/drejtuesi si dhe përgjegjësat e sektorëve përkatës, në rastin konkret përgjegjësi i legalizimeve. Ankesa e zotërisë në fjalë do të shikohet me përparësinë më të madhe dhe njëkohësisht do të ngrihet grupi, maksimumi ditën e nesërme, për verifikimin në terren në mënyrë që t’i japim një zgjidhje ligjore për ato problematike që ekzistojnë. Nga vetëdeklarimi është i 2006, certifikata në 2021. Duke qenë se jemi staf i ri do i japim zgjidhje sa më shpejt që të jetë e mundur me përparësinë maksimale, gjithmonë në rrugën ligjore, në maksimumin e mundshëm”, tha Memcaj.
Pas këtij momenti, ky institucion na ktheu përgjigjen me hapat, që do të ndiqen deri në zgjidhjen e plotë të legalizimit të shtëpisë së tij.
Gazetarja: Mua m’u tha që sot doli leja e legalizimit për gjysmën e shtëpisë.
Denoncuesi: Faleminderit, faleminderit, dëgjo këtu, unë nuk di si t’ju përgëzoj ju për tërë këtë kurajo ë. Hajde ju boft shëndet o Zot ishalla./tvklan.al
Discussion about this post