Ish-mbrojtësi i Manchester United, Juventusit dhe kombëtares së Francës, Patrice Evra, ka bërën një deklaratë të fortë ditën e sotme. Sipas tij, në cdo ekip futbolli ka të paktën nga një lojtar gay, por homoseksualiteti vazhdon të mbetet tabu mes lojtarëve.
Një libër rrëfimi, Evra zbulon se ka të paktën dy homoseksualë në çdo ekip dhe më pas flet për abuzimet e pësuar si trembëdhjetë vjeçar. “Duhet të dëshmoj, për të shtyrë djemtë dhe vajzat viktima të dhunës që të mos mbyllen në heshtje”, shprehet ai.
Abuzimi seksual është një kapitull, që Evra e ka treguar gjerësisht tashmë në intervista të ndryshme në Angli, ku jetoi pjesën më të madhe të karrierës së tij, madje edhe si kapiten i “Djajve të Kuq”. Por Evra bën një hap më tej dhe niset drejt një tjetër territori të errët në botën e futbollit profesionist:
“Në futboll gjithçka është e mbyllur. Nëse si futbollist thua se je gay, je i vdekur. Mbaj mend që një person erdhi një herë për të folur me ekipin për homoseksualitetin. Disa kolegë thanë se homoseksualiteti ishte kundër fesë së tyre dhe se nëse do të kishte një homoseksual në dhomat e zhveshjes, ai duhej të dëbohej nga klubi. Kam luajtur me homoseksualët, më kanë folur, vetëm se kanë frikë të hapen publikisht. Ka të paktën dy homoseksualë në çdo ekip. Por në futboll nëse thua kështu, ke mbaruar”, ka thënë ai.
Një dëshmi e rëndësishme, pavarësisht se Evra në të kaluarën, e ka ilustruar veten me deklarata jo tamam respektuese. Gjithsesi, ish-futbollisti francez shumë i njohur edhe në rrjetet sociale, shprehet për nevojën për të mos heshtur, kur dikush i nënshtrohet abuzimit seksual në fëmijëri.
“Nuk e thashë dhe aq për vete, por për këdo që është në të njëjtën situatë si unë kur u përdhunova në moshën 13-vjeçare. E mbajta të gjitha brenda për vite me radhë derisa, duke parë një emision televiziv me këtë temë, shpërtheva në lot dhe i rrëfeva gjithçka gruas sime. Duhet të flasim gjithmonë dhe të raportojmë ata që kryejnë akte të tilla, edhe nëse fajtorët janë familjarë, për të mos jetuar në trauma”. Së fundmi, Evra përsëriti betejën e tij kundër racizmit, duke e cilësuar si të pamjaftueshme atë që është bërë deri më tani.
Discussion about this post