Përveç punimeve in tensive, që kanë vënë gjithë hierarkinë e klubit në lëvizje, skuadra vijon çdo ditë përgatitjet për ndeshjen me Bylisin, të cilën drejtuesit kërkojnë me patjetër ta fitojnë, për ta nisur me këmbë të mbarë aventurën në stadiumin e ri.
PENGESAT – Përtej dëshirës, nuk do të jetë aspak e lehtë për skuadrën e Xhovani Kolelës. Dëmtimet janë kthyer në një armik të madh për të kuqtë në këtë sezon, pasi thuajse në çdo ndeshje nuk kanë arritur të shkojnë të plotë. Gjithnjë ka munguar minimalisht një titullar.
MATONDO – Edhe në ndeshjen me Bylisin do të mungojë një titullar, sepse Matondo ka pësuar një dëmtim në gju dhe nuk është gati. Nga ana tjetër, me siguri mesfushori ngre kokën lart dhe falënderon Zotin që kjo është ndeshja e fundit para Botërorit dhe ka një muaj kohë për t’u rikuperuar, para se skuadra të kthehet sërish në aksion.
TELUSHI – Mesfushori nga Vlora, në mungesë të Matondos, është alternativa e parë për të luajtur, por edhe kjo nuk do të jetë e mundur. Gjatë javës Telushi shfaqi një shqetësim muskulor dhe stafi mjekësor thuajse i ka shuar shpresat që ai të jetë gati ndaj Bylisit.
Mesfushori ka nevojë për më shumë kohë dhe te “demat” nuk kanë në plan ta rrezikojnë. Nga ana tjetër një rikthim shumë i rëndësishëm është Murataj, i cili pritet në fushë si titullar. Gjithashtu, sot skuadrës do t’i bashkohen edhe 5 lojtarët, që u angazhuan me Kombëtaren ndaj Katarit.
DA SILVA – Lajme të mira vijnë nga braziliani. Ai ka arritur të stërvitet me ritëm të lartë prej tri ditësh dhe në rast se vazhdon në këtë gjendje dhe nuk ka surpriza, është e sigurt se Kolela do ta ketë në dispozicion ndaj Bylisit, në një ndeshje shumë delikate.
Discussion about this post