Daily Mail: U fut dy herë ilegalisht në Britani, kush është shqiptari që kreu vrasje në Shqipëri dhe kërcënoi një grua në rrugët e Uellsit

Daily Mail i ka kushtuar një artikull një krimineli të rrezikshëm shqiptar,i cili kishte vuajtur dënim për vrasje në Shqipëri dhe më pas kishte arritur të hyjë dy herë ilegalisht në Mbretërinë e Bashkuar, duke vazhduar aktivitetin kriminal.

Bëhet fjalë për Edmond Kallmin, 50 vjeç, i cili në tetor 2022 kërcënoi një shofere grua në qytetin Ferndale të Uellsit, duke i drejtuar një armë false dhe duke i thënë: “Po sikur të të qëlloj?”. Për këtë ngjarje, ai u dënua me 18 muaj burg në Britaninë e Madhe.

Por e shkuara e tij kriminale është edhe më e rëndë shkruan Mail.

Dokumentet gjyqësore të siguruara nga autoritetet britanike tregojnë se Kallmi ishte dënuar për një vrasje makabre në Shqipëri, në vitin 1998. Ai dhe një bashkëpunëtor i tij hynë me forcë në shtëpinë e një familjeje dhe qëlluan për vdekje me një AK- 47 një grua, e cila mbante në krah djalin e saj njëvjeçar. Objektivi i tyre ishte bashkëshorti i saj, me të cilin kishin pasur një sherr në një bar.

“Pas vrasjes, Kallmi u arratis drejt Britanisë, ku më vonë, në vitin 2007, u dënua edhe për një sulm me thikë. Në vitin 2009 ai u ekstradua në Shqipëri, ku një gjykatë konfirmoi dënimin e tij për vrasje. Megjithatë, vetëm pak vite më pas ai arriti sërish të kthehej ilegalisht në Britani, ku jetoi me gruan dhe vajzën e tij.”, sqaron më tej Daily Mail.

Ekspertë të sigurisë në Britani e kanë cilësuar rastin si “shembullin perfekt të dështimit të kufijve”, duke ngritur shqetësime serioze se si një i dënuar për vrasje mund të hyjë përsëri në vend pas ekstradimit. Robert Bates, nga Qendra për Kontrollin e Migracionit, tha se rrugët e Britanisë janë kthyer në shesh lojërash për krinimelët.

“Fakti që jy burrë arriti të hyjë sërish në Britani është tregues i gjendjes së trazuar të kufijve tanë. Politikanët po e zhgënjejnë publikun duke lejuar që individë brutalë të trajtojnë rrugët tona si shesh lojërash.”, u shpreh Bates.

Ministria e Brendshme britanike nuk dha detaje nëse Kallmi do të ekstadohet sërish, por deklaroi se qeveria do të bëjë gjithçka për të larguar nga vendi kriminelët e huaj që paraqesin rrezik për publikun.