Vendosja e kangjellave anës trotuarit që përshkon bulevardin ‘Nënë Tereza’ do t’i kushtojë qytetarëve të Kamzës çmimin real plus “taksën” e pashpallur që vendos korrupsioni. Pra, nëse kjo punë mund të bëhet me 100 milion lekë, tenderi abuziv i vendos një vlerë afro 175 milionë lekë (përfshirë TVSH). Megjithëse nuk janë kangjella prej argjendi, por tuba hekuri, për këtë punë kryetari i bashkisë Kamëz, Rakip Suli ka vendosur të shpenzojë fondin limit 146 milionë lekë, i cili duke llogaritur shtesën e TVSH shkon mbi 175 milionë lekë.
Kontrata e dalë nga prokurimi me objekt ‘Rrethim me kangjella te Bulevardi “Nënë Tereza” është publikuar më datë 30 korrik 2024.
‘Open Data Albania’ përshkruan se ky tender është zhvilluar pa garë të rregullt, pasi Suli ka përjashtuar të gjitha oferta, përveç firmës që kishte planifikuar si fituese. Theksojmë se “Flamuri i kuq” i vendosur për këtë tender tregon riskun e korrupsionit.
Sipas dokumenteve, fillimisht janë dorëzuar 5 oferta, ku më ekonomikja ishte oferta e “ASI INVEST” me vlerë 103 milionë lekë, më pas ajo e “KOMBEAS” me vlerë 115 milionë lekë dhe AIDA CONSTRUCTION me vlerë 128 milionë lekë. Por këto oferta ekonomike janë skualifikuar që në fazën e parë me argumentin se nuk kanë paraqitur dokumentet që kanë paguar detyrimet si energji elektrike apo shërbime të tjera. Ndërsa njëra prej tyre është quajtur ofertë “anomalisht e ulët”.
Në fakt, në këtë rast është fondi limit që është llogaritur “anomalisht i lartë”.
Sidoqoftë, Suli e gjen rrugën për të favorizuar kompani të caktuara, ndërsa të tjerat që e pengojnë, i skualifikon. Për mungesë dokumentesh është përjashtuar edhe një ofertë tjetër, ndonëse rregulli kërkon që konkurrentët të njoftohen për këto mungesa.
Në këtë rast firma e paracaktuar ishte “DESARET COMPANY”, e cila kishte edhe ofertën më të shtrenjtë, me vlerë 131 milionë lekë, ose rreth 160 milionë lekë me TVSH.
Kjo kompani ka rrënjë të forta politike dhe llogaritet fituese në tenderat që aplikon. Pronari i saj Vladimir Metani është daja i ish-presidentit Ilir Meta. Me këtë tender vërtetohet se, kur vjen fjala tek paratë, nuk ka ndarje politike, por pazare.
Kujtojmë se Kryetari i bashkisë Kamëz, Rakip Suli, është paraqitur dy herë në SPAK në nëntor 2023. SPAK po kryen hetime për veprat “Ushtrim i ndikimit të paligjshëm”, “shpërdorim detyre”, “shkelje e barazisë në tendera” dhe korrupsion, pas kallëzimit të banorëve të Kamzës.
Rakip Suli është denoncuar edhe nga një grup këshilltarësh të bashkisë Kamëz, duke iu referuar raportit të KLSH-së pas kontrollit në këtë institucion.
Burime bëjnë me dije se SPAK po kryen hetime për zyrtarë të bashkisë Kamëz, lidhur tendera të pastrimit të qytetit dhe dëmshpërblimet për tërmetin. Pas kallëzimeve të mbërritura në strukturën antikorrupsion, ky institucion ka regjistruar procedim penal, ndërsa hetimet po kryhen nga prokurori Elvin Gokaj. Mësohet se për këtë çështje janë thirrur dhe janë marrë në pyetje disa drejtorë të këtij institucioni dhe janë sekuestruar dokumente nga bashkia.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post