Kolaudimi për pallatin 11-katësh në Durrës, një proces kyç për sigurinë e një objekti, jo vetëm është bërë 3 vite pasi objekti ishte i banueshëm, por ekspertja Ferzilet Hajdëri, ka miratuar si të rregullt objektin dhe nuk ka pasqyruar mangësitë.
Kur në të vërtetë, sipas prokurorisë, në muret rrethuese të garazhit nuk ishin vendosur pilotat. Është provuar që në zbatim janë hequr muret betonarme në garazh dhe janë lënë të hapura duke i zëvendësuar me vetrata xhami. Ashensori nuk zbret deri në garazh, janë ndërtuar shkallë nga jashtë për të zbritur në katin.
Të gjitha abuzimet ishin konstatuar edhe në vitin 2011. Inspektorët e ndërtimit kanë konstatuar aso kohe se jo vetëm po ndërtohej pa leje, por punimet ishin devijuar, ishte betonuar kolana e katit të pestë, kishin devijuar disa prej akseve, disa akse të tjera duhet të ishin ndërprerë po ato vijonin të zgjateshin. Për të gjitha këto shkelje aso kohe u kërkua pezullim i punimeve dhe gjobë 60 mijë lekë.
Në të njëjtën kohë që kryebashkiaku, Dako, firmos lejen për shtëse katesh, ai firmos edhe raportin e inspektorëve të ndërtimit që punimet e pallatit të mbaheshin të pezulluar për shkak të shkeljeve. Ky është gabimi thelbësor i ish-kryebashkiakut mbi të cilin prokuroria krijoi bindjen se ai ka qenë në dijeni të situatës.
“Kjo bën që të arrihet në konkluzion se të gjitha dokumentet e sipërcituara janë të falsifikuara, duke vërtetuar katërcipërisht qëllimin kriminal, pajisjen me dokumentacion tekniko ligjor të një objekti ndërtuar jo vetëm pa u zbardhur leja e ndërtimit, por edhe pa respektuar kushtet e parashikuara në projektin e paraqitur”, citohet në dosjen hetimore.
“Rasti Vangjush Dakos është i ngjashëm me raste të tjera të SPAK që s’merret me probleme të rëndësishme madhore, por mjaftohet me raste që në vetvete dhe qytetarët nuk tregojnë peshën e lartë të ngjarjeve apo korrupsionit që zhvillohet në Shqipëri”, u shpreh avokati Redi Ramaj.
Tjetër padi ndaj Dakos
Një tjetër padi është depozituar në SPAK nga një pallat që ndodhet vetëm pak metra larg godinës për të cilën u prangos ish-kryebashkiaku i Durrësit, Vangjush Dako.
Që prej nëntorit të vitit 2019, edhe ky pallat është i pabanueshëm. 17 familje të këtij pallati, i cili përfundoi më 2014-ën, kanë ngritur po ashtu një padi ndaj ndërtuesit dhe ish kryebashkiakut Dako.
Bashkim Xhika i shpenzoi të gjitha kursimet e tij si emigrant i paligjshëm në Angli, për të blerë këtë apartament në qytetin bregdetar të Durrësit. Ai po ashtu ka blerë një hyrje edhe në pallatin tjetër që akuzohet Dako, ndaj është firmëtar i kallëzimit edhe tek godina tjetër.
“Unë jam një nga 90 familjarë se i ka e njëjta firmë të dy, ne i kemi çuar se tërmeti na shkatërroi pronën, por jo tërmeti, na i shkatërroi ndërtuesi meqenëse binte edhe ky pallati këtu ngjitur me ne. Tërmeti ka shkatërruar ato që ishin ndërtuar jashtë kushteve teknike”, tha i dëmtuari nga tërmeti i 26 nëntorit, Bashkim Xhika.
“Kam punuar emigrant në Angli edhe i kam paguar lekët në gropë, nuk kam pritur të përfundojë dhe të gjitha kursimet i futa në plehra tek të dy pallatet”, u shpreh Bashkim Xhika.
Pallati pësoi dëmtime strukturore të rëndësishme nga tërmeti i vitit 2019. Siç e shikoni ai ka pësuar një anim të fortë, duke i futur banorët në një spirale procedurash nëse ishte i banueshëm apo jo.
Pavarësisht paralajmërimeve të ekspertëve për të braktisur pallatin, vetëm në shkurt të vitit 2022, bashkia e Durrësit pranoi propozimin e institutit të ndërtimit për ta shpallur të pabanueshëm.
“Gjysma është pa leje pa letër lart, njëlloj janë të dyja pallatet, janë zhdukur letrat”, tha Xhika.
Banorët pretendojnë se pallati kishte mangësi të mëdha në ndërtim, të vërtetuara edhe nga akt ekspertimi. Ky është akt ekspertimi i kryer nga kompania A.L.T.E.A dhe Geostudio 2000, që konfirmon se pallati nuk kishte pilota por vetëm një pllakë betoni.
“Të gjithë si banorë duam të prishen pallatet, të rindërtohen dhe të kompensohemi për pronat që kemi në brenda”, tha Bashkim Xhika.
Ajo që e bën më absurde këtë situatë është fakti se ka banorë që sapo ishin futur në shtëpitë e reja, të blera me kredi, dhe ndonëse që nga 2019 nuk jetojnë më në to, vazhdojnë e paguajë ende kredinë. Bankat kanë deklaruar se do ta ndërpresin pagesën e kredisë, vetëm kur të shembet objekti. Deri atëherë ata duhet të vazhdojnë të paguajnë çdo muaj kredi, për një shtëpi që nuk e kanë, megjithëse vendimi i prishjes së këtij pallati ka dalë.
“I kanë fëmijët pa bukë dhe paguajnë kredi, dhe s’kanë marrë as bonusin prej 3 muajsh se u harxhuan lekët për votime”, u shpreh Xhika.
Vetë denoncuesit e çështjes shprehen skeptikë mbi gjithë procesin penal të iniciuar. Ata, nuk kanë asnjë interes se kush dënohet në këtë proces që e konsiderojnë politik, por kërkojnë thjesht të drejtat e tyre për pronën.
“Këtë nuk e pritshim ne që do të arrestonin Dako, mendonim se do thirrej se thirret çdo njeri që ka dijeni , duke parë fshehjet që i janë bërë kësaj çështje nuk besonim që do të ndodhte., por mua më duket më shumë punë politike. Për mua s’dua të dënohet fare Dako, çfarë ka bërë e ka bërë me shtetin mua s’më ka bërë asgjë për mua asnjë orë të mos bëjë burg, është punë politike arrestimi i Dakos”, tha Xhika.
“Po veprohet në një formë apo mënyrë që nuk jep besueshmëri te qytetarët, te prokuroria dhe organet që kanë kryer hetimin”, tha avokati Redi Ramaj./Top Channel/
Discussion about this post