Daku shkëlqen me dopietë në Rusi, dedikim për Martin Canin

Mirlind Daku është shfaqur në formë të shkëlqyer në Rusi me fanellën e Rubin Kazan, pas grumbullimit me Kombëtaren.

Sulmuesi ishte protagonist me dopietë golash, në fitoren 3-0 të skuadrës së tij në kampionat ndaj Akron Togliatti.

Daku zhbllokoi sfidën në minutën e 10-të, ndërsa në të 20-ën, dyfishoi shifrat, duke i hapur rrugën fitores së Rubin Kazan.

Pas ndeshjes 26-vjeçari, kishte një dedikim të veçantë, duke thënë se dy golat e shënuar shkojnë për Martinin Canin, 14-vjeçari që u vra me thikë nga një bashkëmoshatar i tij.

Në 15 ndeshje të luajtura këtë sezon, Daku numron 8 gola të shënuar me Rubin Kazan dhe 3 asiste.