Ministra e Drejtësisë së Kosovës, Albulena Haxhiu njoftoi zyrtarisht se shteti i Kosovës ka bërë një marrëveshje me Danimarkën për t’i ofruar kësaj të fundit hapësirë për 300 të burgosur, të cilët pas përfundimit të dënimit do të dëboheshin nga Danimarka.
“Do ta vizitojmë edhe këtë qendër korrektuese. Kjo marrëveshje përfshinë edhe mbështetje financiarë për Kosovën, ndonëse unë detajet sot nuk mund t’i them sepse ato do të shpalosën shumë shpejt dhe po ashtu investim në energji të ripërtërishme, që është nevojë urgjente e Kosovës, por edhe mbështetje me donacione që lidhen me sundimin e ligjit”, tha ministrja Haxhiu.
Ky projekt , i cili synon të lehtësojë mbipopullimin e burgjeve, do të zgjerojë gjithashtu pronën e burgjeve të Danimarkës me 326 vende midis 2022 dhe 2025, tha në një deklaratë ministria daneze e drejtësisë.
Vitin e kaluar, 350 të burgosur do të dëboheshin në fund të dënimit të tyre.
Popullsia e burgjeve të Danimarkës është rritur me 19% që nga viti 2015, duke arritur në më shumë se 4,000 të burgosur në fillim të vitit 2021 dhe duke tejkaluar 100% të kapacitetit, sipas statistikave zyrtare.
“Me marrëveshjen është rënë dakord që të merren me qira 300 burgje në Kosovë dhe të zgjerohet kapaciteti i burgjeve në Danimarkë për disa qindra vende”, thuhet në deklaratën e zyrtarëvë danezë.
Ministrja e Drejtësisë në Kosovë, njoftoi se detajet do të bëhen të ditura javën e ardhshme, pas vizitës së ministrit të Drejtësisë së Danimarkës, teksa bëri me dije se bëhet fjalë për burgun e qytetit të Gjilanit.
Kosova kishte 1,642 të burgosur që nga viti 2020, 97% e kapacitetit, sipas Raportit Botëror të Burgjeve të Universitetit të Londrës.
Discussion about this post