Mund të quhet më plot gojë supersfida e mbrëmjes së kësaj të enjteje, ku në lojë është kualifikimi historik, për në fazën me eleminim direkt, të një kompeticioni evropian. Bëhet fjalë për Ballkanin e Ilir Dajës, me “Dardanët” e Suharekës, që do të udhëtojnë drejt Zagrebit, për t’u përballur në “Stadion Maksimir” me Dinamon vendase.
Padyshim objektivi kryesor për djemtë e Ilir Dajës është sigurimi i 3 pikëve, me fitoren, që është i vetmi opsion për kampionët në fuqi të Kosovës, për siguruar ecurinë, në fazën me eleminim direkt.
Ndeshja e luajtur në “Fadil Vokrri” mes Ballkanit dhe Dinamos së Zagrebit, përfundoi me fitoren 2-0 të kampionëve dardanë, me Kryeziun e Hamidin, që çuan respektivisht topin në rrjetë, duke siguruar deri më tani të vetmin sukses të djemve të Ilir Dajës në grupin C.
Te Ballkani e kanë të qartë se nuk kanë asgjë për të humbur dhe në kryeqytetin kroat do të tentojnë të befasojnë përsëri “Blutë” vendas, me këta të fundit, që u mjafton edhe një barazim për të vazhduar rrugëtimin evropian.
Përsa i përket mungesa, për teknikun Ilir Daja mungojnë Kryeziu, i cili është i dëmtuar edhe Hamidi, i cili është i pezulluar. Në krahun tjetër, “strategu” i “Dardanëve” deklaroi gjatë konferencës për shtypin se skuadrën e tij e pret një ndeshje e vështirë, por Ballkani do të futet në fushë për të siguruar maksimumin nga kjo përballje.
Discussion about this post