Kreu i Grupit Parlamentar të PS, Taulant Balla, gjatë një konference për shtyp ditën e sotme është pyetur në lidhje me akuzat e ish-kryeministrit Berisha, ku pretendonte se Balla ka darkur me Bashën dhe Veliajn për pazare politike. Në mënyrë kategorike, Balla mohoi që të jetë takuar me Bashën, ndërsa shtoi se i vetmi vend ku do të takohet me kryedemokratin do të jetë gjykata. Sipas tij, të gjitha këto Berisha i bën vetëm për vëmendje.
“Dua të sqaroj që asnjëherë në jetën time nuk kam qenë në një darkë me Bashën. Ajo që është thënë nga Sali Berisha është vetëm një rishfaqje e 30-vjetëve të Sali Berishës, i cili vetëm me gënjeshtra, shpifje e mashtrime ka lënë gjithë trashëgiminë e vet politike. Është e pakuptimtë për Shqipërinë që për një person të shpallur “non grata” të vazhdojë të marrë vëmendje publike në këtë vend. Mendoj se SHBA shpalljen “non grata të Berishës e kanë bërë mbi bazë faktesh, por edhe si nevojë për të çliruar së pari PD, por edhe Shqipërinë, nga gjithë negativiteti i Sali Berishës në këto 30 vite”, tha ai.
Ndërsa renditi një sërë akuza ndaj Berishës, Balla tha se ka këkruar nga autoritet në vend që të veprojnë ndaj tij pas shpalljes ‘non-grata’. “Jo vetëm e kam përshëndetur shpalljen “non grata” të Sali Berishës, por kërkoj që institucionet e drejtësisë në vendin tonë të bëjnë detyrën, sa i përket hetimeve ndaj këtij individi, që mendon se vetëm me shpifje, madje më rëndë se kaq me kepërdorimin për nevoja politike edhe të fatkeqësive familjare të shumë familjeve. Rasti në fjalë ka qenë një vizitë në një familje të një miku, që për mua është i vyer, dhe që kemi rastisur me shumë njerëz të tjerë. Nekrofilia e ka shoqëruar Sali Berishën gjithë këto vite. Janë të shumta rastet në këto 30 vite, kur Sali Berisha ka mohuar dhe lidhjen familjare, kur i është dashur, si me rastin e Gërdecit, ndërkohë që ka përdorur mish për top për politikën e tij shumë raste të tjera familjare. Sqaroj se i vetmi takim i imi me Lulzim Bashën do jetë në gjyq për shpifje”, tha ai.
Discussion about this post