Raporti i DASH: Korrupsioni në Shqipëri, në çdo degë të qeverisë

Në raportin për të drejtat e njeriut në Shqipëri, i cili është publikuar nga Departamenti i Shtetit Amerikan, thuhet se presioni politik dhe korrupsioni e penguan gjyqësorin të funksiononte në mënyrë të pavarur dhe efikase.

Sipas raportit ku është ndalur tek funksionimi i Gjykatave thuhet se politizimi i emërimeve në Gjykatën e Lartë dhe në Gjykatën Kushtetuese, cenoi pavarësinë e institucioneve. Qeveria, bizneset dhe grupet kriminale tentuan të ndërhynin nëpër media në mënyra të papërshtatshme

Në raport theksohet se korrupsioni dhe mungesa e fondeve kufizuan median e pavarur ndërsa thuhet se gazetarët u autocensuruan. Ka pasur preson politik dhe ekonomik mbi mediat duke përfshirë dhunën dhe kërcënimet ndaj gazetarëve.

“Pronarët e bizneseve i përdornin lirisht mediat e tyre për të fituar favore dhe për të promovuar interesat e tyre me partitë politike. Shumica e pronarëve të stacioneve televizive private përdorën përmbajtjen e transmetimeve të tyre për të ndikuar në veprimet e qeverisë ndaj bizneseve të tyre të tjera. Kishte raporte të besueshme të përfaqësuesve të lartë të medias që përdornin organet e medias për të shantazhuar bizneset duke kërcënuar mbulimin mediatik të pafavorshëm, herë faktik dhe herë spekulativ. Presioni politik, korrupsioni dhe mungesa e fondeve kufizuan median e pavarur të shkruar dhe gazetarët thuhet se praktikuan autocensurën.”- thuhet në raport.

Gjithashtu raporti thotë se korrupsioni ishte i përhapur në të gjitha degët e qeverisë, shpesh pati përfshirje në praktika korruptive pa ndëshkime.

“Ligji parashikon dënime penale për korrupsion nga zyrtarët publikë dhe gjithashtu ndalon individët me dënime penale të shërbejnë si kryetarë bashkie, deputetë ose në poste qeveritare ose shtetërore, por qeveria nuk e zbatoi ligjin në mënyrë efektive. Korrupsioni ishte i përhapur në të gjitha degët e qeverisë dhe zyrtarët shpesh përfshiheshin në praktika korruptive pa u ndëshkuar. Shembujt përfshijnë një kandidat për kryetar bashkie të vitit 2019 i dënuar më parë për trafik droge.”- thuhet në raport.

Një shqetësim është edhe korrupsioni policor mbetet problem, pasi policia nuk e ka zbatuar gjithmonë ligjin në mënyrë të barabartë.