DASH: Qytetarë amerikanë, kujdes nëse udhëtoni në Shqipëri

Departamenti amerikan i Shtetit e klasifikon Shqipërinë në nivelin e dytë të paralajmërimit për të gjithë qytetarët amerikanë që duan të udhëtojnë.

E ndërsa vendet e tjera të rajonit si Maqedonia e Veriut apo Kroacia janë në nivelin e parë, ku rekomandohet udhëtimi, në nivelin e dytë, rekomandohet të bëhet kujdes me udhëtimet. Ndërsa niveli i tretë është rekomandim për të mos udhëtuar.

“Tregoni kujdes të shtuar në Shqipëri për shkak të krimit.

Përmbledhje e vendit: Aftësia e forcave të zbatimit të ligjit për të mbrojtur dhe ndihmuar udhëtarët është e kufizuar në disa zona, veçanërisht në rajone të largëta.

Ka pasur dhunë të shënjestruar të lidhur me rrjetet e paligjshme të drogës dhe krimin e organizuar në mbarë vendin.

Udhëtarët duhet të jenë të vetëdijshëm për ambientin që i rrethon dhe shtrirjen e shërbimeve të policisë dhe emergjencës në zonat e tyre,” thuhet në njoftimin zyrtar.

Më pas jepen udhëzime se si duhet të informohet çdo udhëtar amerikan, duke përdorur burimet zyrtare të shtetit amerikan.