Dashamir Shehi, kreu i LZHK, dhe një nga deputetët e opozitës, nuk shprehet optimist lidhur me formën që ka zgjedhur opozita për të rifituar të drejtat e saj kushtetuese dhe parlamentare.
Në studion e A2Cnn, Shehi shprehet se protestat që po zhvillohen në Kuvend mund të kthehen në një cirk të mbyllur, pa dhënë rezultat.
Ai ka zgjedhur të solidarizohet me kolegët duke mos marrë pjesë në komisionet parlamentare.
“Por që të mendoj se kjo është rruga me të cilën duhet të kalojmë ne për të rifituar të drejtat tona parlamentare, për t’iu drejtuar shqiptarëve, se ç’është e mira dhe ç’është e keqja… është një skemë që e kemi përdorur disa herë,” shpjegon ai.
Shehi theksoi se, duke zgjedhur të shkaktojë kaos, opozita po shpërdoron të drejtën që ka për të folur në emër të qytetarëve në Kuvend.
“Parlamenti del në rrugë, protesta është një formulë. Të futësh rrugën në pralament, nuk vlen. Zëri për të folur në parlament është arma që ka sot opozita. Dhe më duket se po e shpërdorojmë. Mirë, keq, gojën nuk na e mbyllin dot ata.”
I pyetur nëse është konsultuar me deputetët që mbështesin Berishën, përpara se të niste aksioni, kreu i LZHK-së, deklaroi se gjysma prej tyre e dinë se mënyra e zgjedhur, nuk është e duhura. Sipas parashikimeve të tij, ajo që po bën opozita sot është “cirk i mbyllur, pa shumë shpresë që do të konsumohet rreth vetes.”
Discussion about this post