Ish-trajneri i Interit, Frenk De Bur ka treguar prapaskenat e dështimit të tij tek zikaltërit. Në fjalën e tij, holandezi nuk ka hezituar për të hedhur akuza ndaj ish-presidentit Tohir.
“Nëse do ta dija si do të shkonte dhe çfarë ambienti do të gjeja aty, nuk do të kisha firmosur kurrë. Unë isha mësuar tek Ajaksi ku të gjithë më mbështesnin dhe çdo sektor bashkëpunonte. Kur shkova në Milano kërkova të analizoja pse zikaltrit nuk po fitonin dhe bisedova me të gjithë ata që ishin pjesë e kompleksit stërvitor, që nga futbollistët e deri te kuzhinierët, me qëllimin për të pasur të gjithë të njëjtin objektiv: të kthenim Interin drejt fitores.
Tashmë që shikoj pas mendoj se duhet të isha përqendruar vetëm te futbolli. Mblodha stafin mjekësor për të shkëmbyer mendime dhe eksperiencat reciproke, por ajo bisedë ishte më shumë monolog.
Askush nuk tha asgjë, ndaj gjëja ishte e pavlerë. E gjithë kjo e shoqëruar me një president që sillte veç kaos në klub duke i prishur balancat në skuadër. Ishte periudhë e errët për Interin, por një leksion për mua”, përfundoi ish-trajneri i zikaltërve.
