De Ketelaere në Milano, sfidon Lukakun e Interit me zgjedhjen e bërë

Telenovela Charles De Ketelaere ka mbërritur në serinë e fundit, me fantazistin belg që zbarkoi në orët e vona të mbrëmjes në Milano dhe sot do të kryejë vizitat mjekësore.

Futbollisti 21-vjeçar ishte objektivi kryesor i Milanit në merkato dhe dyshes Maldini-Masara iu desh të djersinte jo pak për të bindur Club Brugge.

Kuqezinjtë do të paguajnë 32 milionë euro menjëherë, plus 3 të tjera në formë bonusi dhe klubi belg ka ruajtur edhe 12.5% të vlerës së kartonit në rast rishitjeje në të ardhmen të 21-vjeçarit.

De Ketelaere do të firmosë një kontratë 5-vjeçare, nga e cila do të përfitojë një pagë neto prej 2.3 milionë eurosh dhe do të mbajë mbi shpinë fanellën me numrin 90, të njëjtën që mban edhe patrioti i tij belg, Romelu Lukaku në kampin zikaltër.