Mbledhja e sotme e Komisionit të Ligjeve është shoqëruar me debate midis përfaqësuesve të PS dhe PD lidhur me ligjin e Bashkëqeverisjes.
Deputeti i PD, Enkelejd Alibeaj, ka thënë se ky ligj është i pa dobishëm, ndërsa e cilëson si propagandë.
“Nëse keni ngut ta miratoni, respektoni Rregulloren. Nuk po tentojmë të ndryshoni votën. Duhet të na jepni të drejtën për të folur. S’keni ndërmend të bëni asgjë më shumë sesa propaganda. Kjo është tallje me ligjin e koncept. Amendament, neni 4 të shfuqizohet, arsyeja sepse është i padobishëm. E para në pikën 1 që thoni grup interesi që mbron interesin e një grupi. Kjo është e njëjta gjë. Kjo do të thotë që po krijoni konfuzion në legjislacion, që është i padobishëm, por jep impakt dhe në ligjet e tjera. I kam lexuar edhe komentet tuaja. Është e pa denjë, që ministrja të vijë e të thotë që kam hequr dorë nga ligji që kam miratuar. Duhet hequr i gjithë neni sepse është pa sens”, tha Alibeaj.
Nga ana tjetër, kryetarja e komisionit Klotilda Bushka, tha se me bashkëqeverisje, i jepet mundësi qytetarëve të japin ndihmën dhe idetë në shumë nisma.
“Termi bashkëqeverisje do të thotë që nëpërmjet këtij ligji i jepet mundësi qytetarëve, të marrin pjesë në nisma, të thonë fjalën e tyre, të japin një vlerë”, tha ajo.
Deputeti socialist, Toni Gogu është përpjekur të qetësojë ujërat duke kërkuar të vazhdohet me miratimin sipas rregullores, dhe nëse do të ketë mendime të kundërta do të dëgjohen.
