Komisioni Hetimor për zgjedhjet e 25 prillit ka nisur me debat në lidhje me rendin e ditës. Mazhoranca ka kërkuar që të hidhet në votim, por kjo është kundërshtuar nga opozita, e cila thotë se një kërkesë e tillë është e pavend.
Ndërkohë, Deputeti i PD Gazment Bardhi tha gjatë fjalës së tij, se mazhoranca ka hall që të mos thirret si dëshmitar kryeministri Rama, prandaj nxjerrin pengesa të tilla absurde. Kështu , në debat e sipër ai i tha anëtarëve të PS, se Rama do të shkojë të dëshmojë ën atë komision duan apo jo ata.
“E di unë ku e keni hallin, sepse është përcaktuar që do thirret edhe kryeministri Rama. Do të thirret kryetari juaj, doni apo nuk doni ju dhe kjo nuk do ti nënshtrohet votimit sepse kështu e thotë ligji. Ju jeni këtu sepse ju ka caktuar partia. As ne nuk ju diktojmë dot dhe as ju nuk na diktoni dot. Hiqeni idenë se çdo gjë bëhet me forcën e kartonit. Nuk shpikim ne. Prandaj ju lutem shumë ka një praktikë të qartë parlamentare. Nuk është komisioni i parë ky. Kemi rënë dakord, nuk kemi shpikur ligje. E kuptoj që ky komision trajton një temë të prekshme për ju, por eksperiencën e fituar ndër vite duhet ta respektojmë. Prandaj zoti kryetar për të mos vazhduar më të nisim me diskutimin në parim dhe më pas me votimin në parim”, u shpreh ai.
Ndërkohë nga ana e tij, nënkryetari i këtij Komisioni, Toni Gogo akuzoi opozitën se po mban peng komisionin, duke mos hedhur në votim propozimet e kërkuara nga mazhoranca.
