Debati mes Alibeajt dhe Bushkës te “Ligjet”: Po intimidoni institucionin e pavarur

Nuk kanë munguar përplasjet mes deputetëve as në mbledhjen e Komisionit për Çështjet Ligjore, Administratën Publike dhe të Drejtat e Njeriut, ku deputeti Enkeljd Alibeaj është përplasur me kryetaren e Komisionit Klotilda Bushka.

Për dëgjesë ishte thirrur nën kryetari i Këshillit të Lartë të Prokurorisë, Alfred Balla, i cili u shpreh se nuk do të përbënte problem nëse qeveria nuk do të shpërndante fondet për KLP-në. Menjëherë pas tij, Alibeaj tha se përgjigja e Ballës është njësoj si shprehja “mirë me vjehrrën, mirë me nusen”. Ai u shpreh se qëndrimi i zyrtarit të KLP-së linte të dyshonte për lidhje të fshehtë me qeverinë.

Në këtë moment, ndërhyri kryetarja e komisionit Klotilda Bushka duke kërkuar të mos intimidojë institucionet e pavarura.

Alibeaj: Ti po thua, mirë me vjehrrën dhe mirë me nusen. Homologu juaj KLGJ ka bërë kërkesë si çdo institucion tjetër. Ata kanë parë që në vitin 2022 ju ndodh një ngjarje, kanë marrë masat. I kanë çuar kërkesë qeverisë. KLP, institucioni simetrik në funksione, nuk jeni simetrik edhe në reagim. Ju thoni po desh Qeveria edhe na jep para, ne s’kemi bërë kërkesë. Një institucion i pavarur si KLP është treguar minimalisht indiferent.

Bushka: Ju tërheq vëmendjen, mos i intimidoni institucionet e pavarura.

Alibeaj: Nuk është intimidim, nëse e ndjeni të tillë intimidohuni, pak rëndësi ka! Ju e keni marrë me mendjelehtësi këtë punë. Një ngjarje që është më e rëndësishmja për sistemin e drejtësisë në këtë vit.

Bushka: Do ta mbyllim këtë dëgjesë. Gjithçka bëhet këtu për politikë. Po të jeni të shqetësuar ju vërtetë duhet të flisnit këtu për studentët që pse nuk po dalin për të mbyllur vakancat.

Alibeaj: Nëse ju doni ta mbushni shkollën me militantë të fondacionit “Qemal Stafa”.

Bushka: Në vitin 2019 nuk e miratuat nismën dhe ja ku jemi sot. 5 minuta pushim.

Alibeaj: Në vitin 2019 nuk kam qenë në Parlament znj. kryetare, kam qenë në shtëpi.

Është PS ajo që propozoi më herët shtyrjen me 2 vite e gjysmë të afatit të Komisionit të Pavarur të Kualifikimit dhe Komisionerëve Publikë.