Deputetja demokrate Grida Duma gjatë debatit që lindi në konferencën e kryetarëve, u shpreh se maxhoranca duhet të votojë ose të rrëzojë një emër të opozitës të enjten në seancë parlamentare.
Po ashtu ajo ka thënë se nuk ka për të lejuar që të bëhen fasadë dhe të tallen me kandidatin e propozuar.
“Nuk iu ka përjashtuar njeri nga procesi se në fund ju e zgjidhni vetë. Por keni pasur propozimin: jepjani kandidatin opozitës, shkoni votojeni dhe hidheni poshtë. Por që ne të jemi fasada këtu që me kriteret tona ju të nxirrni Presidentin dhe ta votoni dhe të talleni, këtë ta harroni. Unë jam me logjikën të mos e shpejtojmë. Të enjten bëni seancën, të vijmë me një emër nga opozita dhe bëjeni edhe kundër po të doni. Kandidati i qëndron opozitës, votoni standardin e kandidatit tonë. Në rast se nuk e votoni, votat pastaj i keni në xhepet dhe e votoni”, u shpreh Deputetja.
Ndërkohë në fjalën e saj Spiropali tha se e mirëpresin propozimin por duhet të bjen dakort për datat.
“Alibeaj thotë diçka, pastaj Duma thotë diçka tjetër. Pastaj ajo që thotë Mediu që kishte kuptim dhe ishte e arsyeshme. Kur vini përballë nesh duhet të bini dakord se çfarë doni prej nesh. Alibeaj tha se është e rëndësishme se si hyn në këtë process, por më e rëndësishme është se si del nga ky process. Ju ende nuk keni hyrë në process, keni çuar vetëm letra. Ju folët për një sfidë të kulturës së vjetër të pazareve dhe skutave, por nuk dhatë asnjë shembull. Ju sërish paraqesni kushte dhe nuk e sfiduat këtë kulturë. Ju nuk e keni detyrim ndaj nesh ardhjen në konferencë kryetarësh. E keni detyrim ndaj atyre që iu kanë votuar. Meqë po flasim për procese dhe vullnete, letrat nuk i zëvendësojnë proceset. Duma tha të sjellim emrin të enjten. Bujrum, silleni emrin por bini dakord për datat kur do ti sillni”, u shpreh Spiropali.
Kreu i grupit Parlamentar të Partisë Socialiste Taulant Balla u shpreh se raundi i dytë për votimin e Presidentit të ri do të mbahet më 23 maj ora 18:00.
Discussion about this post