Debati për studentët e Mjekësisë/ Alimehmeti: Ligji nuk zgjidh problemin. Reagon Koja…

Mjeku Ilir Alimehmeti fajësoi Qeverinë lidhur me mungesën e mjekëve në Shqipëri, duke theksuar se ka pasur një keqmenaxhim të burimeve njerëzore.

Në studion e emisionit “Open”, Alimehmeti ka debatuar me ish-ministrin socialist të Shëndetësisë, Gjergji Koja, i cili ka mbrojtur ligjin që detyron studentët e Mjekësisë që për disa vite pas diplomimit të punojnë në Shqipëri.

Por për mjekun Alimehmeti ky është një detyrim dhe kufizim që i bëhet mjekëve të ardhshëm, por që nuk i jep zgjidhje asnjë problemi.

“Ky është kufizimi këtu, kur ata që diplomohen mund të kthejmë mbrapsht investimin dhe janë të lirë”, u shpreh Koja.

Debati

Alimehmeti: Bojkoti është mënyra si studentët kanë shfaqur mendimin e tyre kundërshtar me ligjin në fjalë që u miratua me procedurë të përshpejtuar. Ata konsiderojnë se u është bërë një padrejtësi.

Jemi dakord që ka mungesë mjekësh në Shqipëri. Jemi të bindur që ka. Ka një keqmenaxhim të burimeve njerëzore me mjekët. Pse është ndërhyrë në këtë mënyrë. Ky është detyrim për studentët.

Në shumë zona ka njerëz pa shërbim shëndetësor. Çfarë do i themi të moshuarve në këto zona, që të presin 10 vjet që të diplomohen këta mjekë të rinj, apo t’i motivojmë këta mjekë me kushte më të mira që të japin shërbimin? Gjysma e të keqes është pranimi i problemit.

Koja: Dikur studentët dilnin nga shkolla dhe ishin pa punë, sot po flasim për diçka tjetër. Ka disa kuota që parashikon universiteti. Kuotat janë pasojë e bashkëveprimit  të institucioneve të shëndetësisë dhe universitetit. Shteti ka nevoja. Pse këtë vit janë 400 kuota, sepse këto janë nevojat për të ofruar shërbim shëndetësor. E drejta për shërbim shëndetësor është e drejtë kushtetuese. Është çështje e sigurisë kombëtare. Unë si shtet kam investuar, nuk do të shërbesh? Paguaj dhe ik, kthe investimin. Ku qëndron këtu kufizimi.