Debate janë zhvilluar në Komisioni për Nismat Qytetare, Bashkëpunimin dhe Mbikëqyrjen Institucionale, pas masës së sigurisë të dhënë nga GJKKO ndaj drejtores së Shërbimit Informativ të Shtetit, Vlora Hyseni.
Deputeti Ivi Kaso e cilësoi situatën si një zhvillim të pazakontë, ndërsa kritikoi emërimin e Hysenit dhe kërkoi përgjegjësi politike të kryeministrit Edi Rama.
“Sot ka ndodhur e padëgjuara, kur drejtueses së SHISH i merret masë sigurie ndaj saj. Zonja rezulton të ndodhet jashtë Shqipërisë. Kemi të bëjmë me një rënie totale të institucioneve. Opozita e ka denoncuar emërimin e kësaj zonje, në mënyrë të dyshimtë dhe në emër të personit të kryeministrit që sot duhet të mbajë përgjegjësi”, u shpreh Xhafaj.
Sipas tij, kryeministri Edi Rama kishte dhënë garanci për emërimin e Hysenit në krye të SHISH.
Nga ana tjetër, kryetari i Komisionit, Fatmir Xhafaj u ndal edhe te ndarja e përgjegjësive mes institucioneve, duke theksuar rolin e Kuvendit në ushtrimin e kontrollit parlamentar, dhe jo në procese penale.
“Çdo institucion ka detyrën e vet dhe përgjegjësinë e vet. Nëse institucionet e drejtësisë penale kanë funksion drejtësinë penale, ne këtu nuk kemi detyrë të njëjtën gjë, kemi detyrë të ushtrojmë detyrën si përfaqësues të sovranit dhe kontrollin parlamentar”, deklaroi ai.
Duke iu referuar deklaratës së Kasos se “institucionet po arrestojnë njëri-tjetrin”, Xhafaj tha se ky zhvillim i fundit tregon pjekurinë e SPAK e GJKKO dhe zhvillimin e demokracisë në vend.
“Institucionet arrestojnë, jo individët. Dhe kjo është shenjë e pjekurisë së demokracisë. Tregues i qartë i pjekurisë së institucionit. Kjo që po shohim sot është ajo që ndodh rëndom në vendet normale. Fenomen i tillë është normal për një shtet të konsoliduar”, u shpreh kreu i Komisionit të Sigurisë.
Discussion about this post