Reshjet e dëborës kanë përfshirë prej tre ditësh zonat malore në veri të Shqipërisë, duke sjellë vështirësi në qarkullim dhe probleme me furnizimin me energji elektrike. Situata më e rënduar paraqitet në Qarkun e Shkodrës, veçanërisht në zonat turistike të Thethit, Bogës dhe Razmës, ku trashësia e dëborës arrin në disa centimetra.
Sipas raportimeve, akset rrugore Koplik-Bogë, Dedaj-Razëm dhe Bogë-Theth janë të kalueshme, por përdorimi i zinxhirëve është i domosdoshëm për të gjithë dre7jtuesit e automjeteve. Edhe pse reshjet e dëborës kanë pushuar, temperaturat e ulëta kanë krijuar ngrica në rrugë, duke shtuar rrezikshmërinë.
Ndërkohë, po punohet për zgjerimin e rrugës në aksin e Qafë-Thores dhe po monitorohen faqet malore për rrezikun e ortekëve të mundshëm, pasi në disa zona trashësia e dëborës i kalon një metër.
Reshje dëbore janë regjistruar edhe në Bashkinë e Fushë-Arrëzit, në lartësinë mbi 950 metra, por pa shkaktuar probleme në qarkullim apo izolim të banorëve.
Një tjetër problematikë mbetet furnizimi me energji elektrike. Shumë zona malore në bashkitë Malësi e Madhe, Fushë-Arrëz dhe Pukë kanë mbetur pa energji. Grupet e punës ndodhen në terren për riparimin e defekteve dhe rikthimin e energjisë elektrike në këto zona.
Autoritetet apelojnë për kujdes të shtuar nga drejtuesit e mjeteve që lëvizin në drejtim të zonave veriore dhe pajisjen e detyrueshme me zinxhirë për të shmangur incidentet. Deri më tani, nuk raportohet për problematika të theksuara apo bllokim të banorëve.
Discussion about this post