Debutim ëndrrash për mesfushorin shqiptar të Ballkanit, Edvin Kuç, që në moshën 29-vjeçare u thirr nga përfaqësuesja e Malit të Zi, teksa arriti të realizonte dopietë në duelin miqësor ndaj Libanit. Kuç u bë lojtari i parë në historinë e përfaqësues malazeze që realizon dy gola në debutim.
Në një rrëfim special, kapiteni i Ballkanit, tregoi emocionet, teksa për median kosovare, “KOHA” ndër të tjera u shpreh:
“Gjithmonë kam besuar se një ftesë do të vijë. Falënderoj Zotin që ajo ëndërr u bë realitet. Zoti më shpërbleu për atë që kam kaluar në jetë dhe në karrierë.
Nuk mund ta përshkruaj ndjenjën e gëzimit. Vetëm kur nisi himni e kuptova se sa e mrekullueshme ishte dhe çfarë kënaqësie ishte. Shënova dy gola në debutim dhe jam i vetmi lojtar në histori që e bëj një gjë të tillë. Nuk ka mundur të jetë nisje më e mbarë se kjo për mua, por kjo nuk do të thotë se unë duhet të ndalem. Mendoj se ende ka vend për përmirësim dhe se mund të jap ndihmën time për ekipin shtetëror.
Të gjithë më kanë pritur shumë mirë nga dita e parë. Ndieja se kam qenë këtu për kohë të gjatë. Të gjithë janë të lumtur për mua, sepse ata e dinë se sa e vështirë është rruga në futboll”, u shpreh Kuç.
Discussion about this post