Unioni i Gjyqtarëve, Shoqata Kombëtare e Gjyqtarëve dhe Shoqata e Prokurorëve të Republikës së Shqipërisë kanë dalë me një deklaratë të përbashkët, ku kërkojnë zbatimin e plotë të vendimit të Gjykatës Kushtetuese për pagat e magjistratëve.
Sipas tyre, Gjykata Kushtetuese, me vendimin nr. 15 të datës 17 shkurt 2026, shfuqizoi ndryshimet ligjore që cenonin statusin financiar të magjistratëve dhe urdhëroi Kuvendin të miratonte një rregullim të ri deri më 31 korrik 2026.
Shoqatat theksojnë se, për shkak se Kuvendi nuk miratoi ndryshimet brenda afatit të përcaktuar, nga data 1 gusht 2026 ka hyrë automatikisht në fuqi mekanizmi i përcaktuar nga Gjykata Kushtetuese. Ky mekanizëm parashikon që pagat e magjistratëve të llogariten sipas formulës së funksionarëve të administratës së lartë publike, me efekte edhe për periudhën 1 prill 2023 – 31 korrik 2026.
Në deklaratë, organizatat e magjistratëve theksojnë se çështja nuk lidhet vetëm me të drejtat financiare të gjyqtarëve dhe prokurorëve, por edhe me respektimin e Kushtetutës dhe zbatimin e vendimeve përfundimtare të Gjykatës Kushtetuese. Ato shprehen të vendosura të ndjekin zbatimin korrekt të këtij vendimi dhe të kontribuojnë në mënyrë konstruktive në këtë proces.
Discussion about this post