Partia Demokratike ka reaguar sot në lidhje me deklaratën e FMN, ku kritikonte qeverinë për PPP-të dhe mungesë transparence në menaxhimin e fondeve. Përmes një postimi në Facebook, Jorida Tabaku, ka deklaruar se FMN vërtetoi denoncimet e shpeshta të PD, që qeveria po abuzon me fondet dhe keqmenaxhon taksat e mbledhura nga qytetarët.
Sipas saj, kjo qeveri nuk po punon për rimëkëmbjen e ekonomisë por për rrënimin e saj. “Qeveria po dështon në menaxhimin dhe rritjen e të ardhurave në buxhet edhe si pasojë e informalitetit të lartë dhe keqmanaxhimit të taksave. Qeveria po dështon tek shpenzimet, investimet janë jo eficente dhe qytetarët e ekonomia nuk fitojnë prej tyre. Me pak fjalë investimet nuk prodhojnë rritjen e dëshiruar ekonomike, rritjen e punësimit dhe një shëndet më të mirë të ekonomisë”, shkruan ajo.
Sipas Tabakut, qeveria e tregon hapur se favorizon oligarkët duke tejkaluar masën e kontratave koncesionare dhe fondet që shpërndan për to. Ajo thekson se, qeveria tregohet jotrasparente për PPP, sepse kështu mund të vjedh rehat dhe të boshatis buxhetin e shtetit.
Sipas saj, çdo taksë që paguajnë qytetarët nuk kthehet në investim, por kalon direkt në xhepat e koncesionarëve. “Situata me PPP është në kufijtë e çmendurisë, ato zënë 50% të PBB-së për vitin aktual duke e kthyer buxhetin e shqiptarëve në portofolin e miqve të qeverisë. Borxhi Publik pritet të rritet edhe më tej jo vetëm si pasojë e rritjes së PPP-ve por edhe si pasojë e rritjes së normave të interesit.
Transparenca me kontratat, me vendosjen e politikave fiskale dhe ligjeve kanë ndikuar në krijimin e një klime armiqësore me biznesin dhe taksapaguesit por mbi të gjitha që vendosin në pikëpyetje buxhetin në lidhje me PPP. Mungesë e plotë transparence se sa nga taksat e qytetarëve janë shpenzuar për shqiptarët gjatë pandemisë dhe sa i kanë shkuar në xhep koncesionarëve”, shkruan Tabaku
Tabaku vë alarmin se, në këtë mënyrë qeveria bën që qytetarët të varfërohen çdo ditë dhe korrupsioni të lulëzojë.
“Mungesë e plotë transparence për fondet e rindërtimit ndërkohë që gjasat janë që keqpërdorimi është disa milionësh. Ndërkohë që lufta kundër informalitetit ka prodhuar një ekonomi edhe më shumë informale. Shenjat tregojnë se rritja e çmimeve do t’i bëj edhe më shumë dëm të ardhurave të shqiptarëve që do të vidhen nga pesha e inflacionit dhe rritjes së çmimeve”, tha ajo.
Në përfundim, ajo shkruan se, Shqipëria është ajo e varfëruar, me korrupsion, buxhet të shndërruar në portofolin e koncesio arëve dhe oligarkëve
