Ngjarjet e fundit në Malin e Zi kanë tronditur themelet e qeverisë. Një deklaratë e fortë është bërë nga zëvendëskryeministri i Malit të Zi, Dritan Abazoviç, i cili tha se nuk do të lejojë që policia malazeze të menaxhohet nga Serbia dhe paralajmëroi se nëse ministri i Brendshëm, Sergej Sekulloviç, shkarkohet, ai do ta përmbysë qeverinë e kryeministrit malazez, Zdravko Krivokapiç.
“I kam thënë disa herë kryeministrit dhe kolegëve të mi në qeveri dhe e përsëris: nëse kalohet vija e kuqe – dhe me ngjarjet e fundit, mendoj se e kanë kaluar atë vijë… një hap tjetër përpara dhe nuk është e pamundur që të mos kemi një ministër të ri të Brendshëm, por nuk është e pamundur që të mos kemi edhe një kryeministër të ri. Unë do ta rrëzoja Qeverinë”, tha Abazoviç.
Ai shtoi se do të ndalojë së mbështeturi Qeverinë, nëse mendon se ata po bëjnë diçka që është e padrejtë.
“Policia nuk do të menaxhohet nga Beogradi dhe kjo nuk do të ndodhë mbi kurrizin tim”, tha Abazoviç në një intervistë televizive.
Shkarkimin e Sekulloviçit dhe të drejtorit të Policisë së Malit të Zi, Zoran Bërgjanin, Krivokapiçit ia kërkon partia më e madhe e koalicionit qeverisës Fronti Demokratik. Ky subjekt ka lidhje të ngushta me Beogradin zyrtar.
Kërkesat për shkarkim janë bërë pas trazirave që kanë përcjellë shugurimin e mitropolitit të Kishës Ortodoske Serbe në Mal të Zi, Joanikije, më 5 shtator. Protestuesit malazezë kanë bllokuar hyrjet në qytetin e Cetinës, për të penguar ceremoninë. Më shumë se 50 persona janë plagosur në përleshjet midis policisë dhe protestuesve.
