Deputeti demokrat Flamur Noka foli për aferën e njohur si “5D” të drejtorëve të Erion Veliajt, nga foltorja e Kuvendit këtë të enjte.
Noka tha drejtorët që zëvendësuan ata të aferës “5D” u emëruan me telefonatë nga burgu. Duke u ndaluar te mbështetja që kryeministri i dha kryebashkiakut të Tiranës pas arrestimeve, ai tha se “Veliaj e shantazhoi Edi Ramën”.
Deputeti u shpreh se Erion Veliaj duhet të jepte dorëheqjen pas skandalit.
“Ai i tha Ramës se sa ke përgjegjësi ti për ish zv kryeministrin, aq kam unë për vartësit në bashki. Veliaj duhet të kishte dhënë dorëheqjen. 5D është korrupsion i pashembullt. Kishim dëgjuar vjedhje 20 përqind, por të tillë vjedhje nuk kishim dëgjuar, 100 përqind vjedhje është rast unik dhe askush nuk mban përgjegjësi. Parlamenti duhet të ziente. Këtu është bërë e udhës, vjedhja kap vjedhjen, skandali kap skandalin, ministrat thonë bëhen edhe filma me këto vjedhje. Shqipëria vidhet dhe është në dorë të plaçkitësve. Relativizimi i vjedhjes është e tmerrshme. Veliaj tha se 2-3 pushtetarë kanë vjedhur nga qindra funksionarë e kjo nuk qenka problem sipas tyre”, tha Noka.
“Por, emisionet investigative po zbulojnë se vjedhja është kapilare. Drejtorët e rinj iu diktuan Veliajt nga burgu. Drejtorët që zëvendësuan ata të 5D janë emëruar me telefonatë nga burgu. A e kuptoni në çfarë Republike jetojmë?! Edhe Kumbaro është kumbare e krimit dhe korrupsionit. Të arrestuarit kanë aplikacion, ku kanë komunikuar. Veliaj është peng. SKAP nuk guxon të hetojë. Jeni organizatë kriminale e asgjë më shumë”, shtoi ai.
Ditën e nesërme, opozita ka lajmëruar protestën e tretë para Bashkisë së Tiranës pas arrestimeve të bashkëpunëtorëve të Veliajt, për të kërkuar dorëheqjen e kryebashkiakut. Opozita e cilëson Veliajn “kokën e bandës së drejtorëve” që siç treguan hetimet e SPAK, u jepnin tendera vetes. Gjithashtu, për opozitën, Veliaj është “pronari faktik i inceneratorit të Tiranës”.
Vetë Veliaj vijon të mohojë akuzat, ndërsa SPAK, që po heton dy procedimet penale, deri më tani, nuk ka ngritur asnjë akiuzë ndaj kryebashkiakut.
Lexo edhe:
Discussion about this post