Tashmë është zyrtare. Dekreti i Presidentit Begaj ka mandatuar kryeministrin Edi Rama si përgjegjës jo vetëm për formimin e qeverisë, por edhe për ngritjen dhe funksionimin e “Ministrit Virtual të Inteligjencës Artificiale Diella”. Por, ndryshe nga sa shitet nga megafoni i propagandës së pushtetit, ky nuk është thjesht një hap drejt “dixhitalizimit”. Nën petkun e tenologjisë, kontrolli mbi qindra miliona euro të tenderave publikë nuk do të jetë më i shpërndarë mes ministrive, por do të centralizohet drejtpërdrejt në duart e kryeministrit.
Për vite me radhë, Rama ka pranuar korrupsionin masiv në prokurimet publike, duke e quajtur atë “qelb” dhe duke ua faturuar përgjegjësinë zyrtarëve të niveleve më të ulëta. Tani, pas më shumë se një dekade në pushtet, ai ka gjetur “zgjidhjen”: heqjen e tenderave nga ministritë dhe kalimin e tyre tek një entitet i ri, “ministrja” virtuale Diella, që do të funksionojë nën kontrollin e plotë të zyrës së tij.
Ky plan vjen pas një vargu dështimesh, ku e-Albania u kthye në një labirint digjital, Kadastra u bllokua, dhe të dhënat e ndjeshme të qytetarëve u vodhën në sulmet kibernetike. Dështimi spektakolar i Diellës, që nuk diti t’i përgjigjet një pyetjeje bazike për taksat, tregoi se kjo qeveri investon miliona euro në teknologji për propagandë dhe fasadë, jo për funksion.
Me këtë dekret, Rama nuk po e lufton korrupsionin; ai po e “dixhitalizon” atë. Përpara, tenderat ishin në duart e “disa njerëzve që bëjnë punë tjetër,” siç i përshkruante vetë ai. Tani, ata kalojnë nën mbikëqyrjen e një kryeministri që ligjërisht merr në dorë një nga burimet kryesore të pasurimit në vend. Kjo nuk është modernizim, por centralizim i pushtetit dhe kontrollit mbi burimet financiare të shtetit. Është një sinjal i qartë se korrupsioni nuk do të zhduket, thjesht do të ndryshojë adresë.
Discussion about this post