Efektivi i policisë së Kosovës, Alban Rashiti, i cili u plagos dje nga grupet kriminale serbe në Banjskë të Zveçanit, është liruar nga Qendra Klinike Universitare, ku ishte duke u trajtuar.
Këtë e ka konfirmuar drejtori i Klinikës së Kirurgjisë Torakale, Nazmi Kolgeci.
Kolgeci theksoi se ai ka lënë ambientet e spitalit, pasi gjendja e tij shëndetësorë është stabilizuar.
Policia e Kosovës më 24 shtator u sulmua nga grupe kriminale në veri, ku u vra polici Afrim Bunjaku, një tjetër polic u plagos dhe një u lëndua.
Pas aktit terrorist, rreth 30 persona të armatosur u fshehën në manastirin në Banjskë. Policia e Kosovës ftoi personat e armatosur të dorëzohen por ata vazhduan me sulme ndaj policisë.
Policia njoftoi gjatë ditës së diel, se janë vrarë tre sulmues, si dhe ka arritur të arrestojë dy sulmues, dhe katër persona tjerë të cilët dyshohen se janë përfshirë me sulmin terrorist.
Discussion about this post