Rritja e rasteve të reja me COVID-19 në ditët e fundit në Kosovë si pasojë e përhapjes së variantit Delta, ka bërë që Kosova të renditet e para për vdekshmërinë nga virusi.
Të dhënat e Universitetit Johns Hopkins paraqesin se Kosova është vendi me vdekshmërinë më të lartë për 1 milion banorë. Ky përfundim është nxjerrë bazuar në shifrat e jetëve të humbura të kësaj jave. Nga data 20 deri më 26 gusht, në Kosovë kanë humbur jetën 85 persona si pasojë e koronavirusit.
Nga dita e nesërme do të hyjnë në fuqi masat e reja në Kosovë që u miratuan nga qeveria ditën e sotme ku do të rikthehen kufizimet e lëvizjes dhe të shtyje hapjen e shkollave. Mësimi do nisë më 13 shtator, ndërsa nga ora 22 deri në 5 të mëngjesit ka ore policore.
Ndërsa, lokalet hoteliere, restorantet dhe kafeteritë do të punojnë deri në orën 21:30 dhe atë në ambientet e hapura. Të gjithë qytetarët që hyjnë në Kosovë në pikë- kalimet kufitare duhet të paraqesin dokumente përkatëse, siç janë dëshmia e vaksinimit, testi PCR i bërë në 72 orët e fundit, ose testi serologjik jo më i vjetër se 30 ditë.
