Deputetja e Partia Demokratike, Dhurata Çupi ka reaguar për vendimin e dhënë me 1 vit burg për Denis Xholin dhe Albjon Cekun, të cilët u dënuan për korrupsion aktiv në zgjedhje.
Në një postim në facebook, Çupi shkruan se masakra zgjedhore është konfirmuar, mirëpo drejtësia nuk është e plotë pa u dënuar të gjithë organizatorët.
Çupi shprehet se ajo çfarë ndodhi në Dibër ka qenë vetëm maja e ajsbergut, pasi gjithçka ka qenë e planifikuar nga lart, prandaj dhe Partia Demokratike kërkon hetim dhe drejtësi të plotë për këtë masakër zgjedhore.
“Se e ka vjedhur Rilindja pushtetin, jo vetëm e kam denoncuar gjate fushatës por edhe pas shpalljes së rezultatit. Ditën për diell, rilindasit të angazhuar me çdo formë për të mbajtur pushtetin, blenë vota, blenë vullnetin e lirë, ushtruan presion me heqjen e ndihmës ekonomike apo edhe duke ofruar vende pune të përkohshme. Kjo që ka ndodhur në Dibër është vetëm maja e ajsbergut. Gjithçka ka qenë e orkestruar nga lart dhe me zbatim deri në çdo qelizë ku mund të merrej vota në çdo formë.
Kjo është masakra zgjedhore për të cilën PD kërkon hetim dhe drejtësi të plotë. Për këtë arsye drejtësia duhet të veprojë që nga organizatorët e kësaj masakre dhe për çdo person të përfshirë në këtë aferë të vjedhjes së vullnetit të shqiptarëve. Drejtësia është e paplotë me dënimin e 2 personave por duhet të shkojë tek i gjithë zinxhiri i vjedhjes së votave të shqiptarëve” – shkruan ajo.
Kujtojmë se ditën e sotme Denis Xholi dhe Albjon Ceku u dënuan me 1 vit burg pasi akuzohen për korrupsion aktiv në zgjedhje. Më 22 prill ata u kapën nga Luan Haka dhe mbështetësit e Partisë Demokratike me një shumë monetare dhe fletë votimi.
Discussion about this post