Gjykata e Posaçme ka vendosur lirimin nga paraburgimi të ish shefit të IKMT-së së Sarandës, Julian Preni. Gjithashtu u vendos edhe lirimi i ish-punonjësit të Zyrës së Urbanistikës Sarandë, Arjel Balani.
Të dy u arrestuan në qershor të këtij viti me urdhër të SPAK. Ndërsa lirimi i tyre vjen me argumentimin se kohëzgjatja e paraburgimit të vuajtur është më e madhe se masa e dënimit të caktuar.
Më 26 Qershor të këtij viti, Julian Preni u shpall fajtor për kryerjen e veprës penale “Korrupsioni pasiv i personave që ushtrojne funksione publike”, duke u dënuar me dy vite burgim, por për shkak të gjykimit të shkurtuar dënimi i shkoi në 1.4 vite burgim. Gjithashtu, atij i është hequr e drejta për të ushtruar funksione publike për një periudhë kohore prej 5 vjetësh.
Në të njëjtën datë i njëjti dënim u dha edhe për Arjel Balanin. Ky u fundit u shpall fajtor për kryerjen e veprës penale “Ushtrimi i ndikimit të paligjshëm ndaj personave që ushtrojnë funksione publike” dhe u dënuar me dy vite burgim, por për shkak të gjykimit të shkurtuar dënimi i shkoi në 1.4 vite burgim.
Arjel Balani akuzohej se i kishte marrë ryshfet shtetasit, Foti Doda në korrik të vitit 2021 në lidhje me një objekt të ndërtuar në plazhin e Ksamilit.
Discussion about this post