Gjykata e Posaçme e Apelit ka lënë në fuqi vendimin për dënimin me 2 vite burg, për ish-Prokurorin e Përgjithshëm Adriatik Llalla.
Më 20 maj, gjykata e Posaçme dënoi me 2 vite burg, si dhe 5 vjet heqje funksionesh publike, ish-Prokurorin e Përgjithshëm, për “fshehje dhe mosdeklarim të pasurisë”.
Po ashtu, Gjykata vendosi edhe konfiskim të pasurive, gati 22 mijë metra katrorë truall dhe një apartament në Durrës.
Prej shkurtit 2018, Llalla është pjesë e listës së zezë të Departamentit Amerikan të Shtetit, që i ka ndaluar hyrjen në SHBA atij dhe familjarëve.
Më herët, përmes avokatit të tij, Llalla kërkoi të shpallet i pafajshëm për akuzën. Sipas Sokol Hazizajt, çështja ndaj Llallës është e paragjykuar, e njëanshme, e padrejtë dhe e paligjshme. Për avokatin Hazizaj, procesi është i stisur.
Llalla prej më shumë se një jave ndodhet jashtë vendit dhe po merr ndihmë mjekësore, pasi sipas akt ekspertize të lëshuar nga vetë mjeku dhe të paraqitur nga avokati Sokol Hazizaj, është në gjendje të rëndë për jetën.
Nga ana tjetër, trupa gjykuese pas një seance që zgjati më shumë se katër orë, vendosi që të lërë në fuqi vendimin e datës 20 maj të shkallës së parë duke dënuar përfundimisht me dy vite burg dhe heqje e drejtës për të ushtruar funksione publike për 5 vjet ish-kryeprokurorin Llalla.
Më 9 shtator u mbajt seanca e fundit për ish-kryeprokurorin Llalla. Vetë ish-kryeprokurori nuk ishte prezent në seancë, pasi sipas avokatit të tij, Sokol Hazizaj, ai është sëmurë në gjendje të rëndë dhe ndodhej në regjim spitalor. Hazizaj kërkoi pafajësi për Llallën ose rikthimin për gjykim të çështjes sërish në Shkallën e Parë por me një tjetër trupë gjykuese, kërkesa që u rrëzuan nga trupa gjykuese.
Në seancë ndodheshin edhe ndërkombëtarët, kryesisht të Ambasadës Amerikane të cilët kanë vëzhguar gjithçka.
Rikujtojmë, se Lllalla u shpall fajtor për fshehjen e shpenzimeve për familjarët e tij në Gjermani në vlerën e 7050 eurove, fshehjen e shpenzimeve për lindjen e djalit në Amerikë në vlerën e 7700 dollarëve si dhe shpenzimet për ndërtimin e katit të 3 të banesës së tij.
