Me 4 vite burg është dënuar udhëheqësja e rrëzuar e Mianmarit, Aung San Suu Kyi 76 vjeç. Ky është dënimi i dhënë nga shkalla e parë, por ajo mund të dënohet edhe me burgim të përjetshëm.
Kyi u shpall fajtore me akuzën e nxitjes së mosmarrëveshjes dhe thyerjes së rregullave të Covid sipas një ligji për fatkeqësitë natyrore. Mbi të rëndojnë 11 akuza. 76-vjeçarja drejtonte një qeveri civile të zgjedhur përpara se të rrëzohej nga një grusht shteti ushtarak në shkurt.
Ushtria mori pushtetin duke pretenduar për mashtrim të votuesve në zgjedhjet e përgjithshme të mbajtura vitin e kaluar, në të cilat NLD fitoi bindshëm. Suu Kyi që atëherë ishte në arrest shtëpiak për korrupsion, shkelje të aktit të sekreteve zyrtare dhe nxitje të trazirave publike.
Nën pretekstin e pandemisë së koronavirusit, zgjedhjet “nuk ishin as të lira as të drejta”, u shpreh zëdhënësi i ushtrisë gjeneral majori Zaw Min Tun në një konferencë shtypi javën e kaluar. Ushtria pretendon të ketë identifikuar raste të mashtrimit, duke përfshirë mijëra qindravjeçarë ose të mitur midis votuesve. Disa ambasada, përfshirë atë të Shteteve të Bashkuara dhe delegacionin e Bashkimit Evropian, i kanë kërkuar Burmës që t’i përmbahet standardeve demokratike. Në zgjedhjet e nëntorit, partia e Aung San Suu Kyi, fituese e Çmimit Nobel për Paqe në 1991, Lidhja Kombëtare e Demokracisë (NLD) fitoi vende të mjaftueshme për të formuar qeverinë.
Discussion about this post