Deputeti i Partisë Demokratike, Klevis Balliu, i ka bërë thirrje SPAK-ut të hetojë në thellësi aferën e AKSHI-t, duke kërkuar verifikimin e mënyrës se si janë përdorur fondet publike dhe nëse ato janë transferuar jashtë Shqipërisë.
Në një deklaratë për mediat, Balliu u ndal te aktiviteti i Ermal Beqirit dhe kompanisë “Al Soft”, për të cilën tha se ka disa elemente që, sipas tij, duhet të hetohen.
Sipas tij, skandali lidhet me keqpërdorim të fondeve publike, favorizimin e klientëve të pushtetit dhe transferimin e përfitimeve jashtë vendit.Ai deklaroi se kompania “Al Soft” është regjistruar në Shqipëri në vitin 2010 dhe po atë vit ka hyrë në procedurë likuidimi. Sipas Balliut, më pas janë regjistruar kompani me të njëjtin emër në Francë, Belgjikë dhe Qipro.
“Rezulton se në qytetin Nîmes të Francës është regjistruar një kompani me të njëjtin emër, AL Soft, ku prezantohet edhe aktiviteti i Al Soft në Shqipëri si histori suksesi. Subjekte me të njëjtin emër rezultojnë të regjistruara edhe në Belgjikë dhe Qipro”, tha Balliu.
Deputeti demokrat kërkoi që SPAK të mos hetojë vetëm kontratat e lidhura me AKSHI-n, por edhe burimin e parave me të cilat janë krijuar aktivitetet e këtyre kompanive jashtë vendit.
Sipas tij, duhet të verifikohen lëvizjet financiare, pronësia e kompanive dhe, nëse ka dyshime për shkelje, të kërkohet bashkëpunimi i autoriteteve në Francë, Belgjikë dhe Qipro.
Balliu shtoi se qytetarët presin që drejtësia të zbardhë këtë çështje dhe të vendosë përgjegjësi për çdo rast të mundshëm abuzimi me fondet publike.
“Heshtje për vjedhje të përmasave të mëdha nuk mund të ketë. Kush ka abuzuar me fondet publike duhet të përgjigjet para ligjit”, u shpreh Balliu.
Discussion about this post