Një denoncim i një 15-vjeçari shqiptar ka vënë në lëvizje autoritetet në ishullin grek të Skiathosit. I mituri ka akuzuar një 17-vjeçar, gjithashtu shqiptar, për abuzim seksual dhe kërcënime të përsëritura.
15-vjeçari është paraqitur në polici së bashku me prindërit e tij, ku ka deklaruar se situata kishte nisur disa vite më parë. Sipas dëshmisë së tij, 17-vjeçari dyshohet se e kishte mbajtur nën presion duke përdorur materiale të regjistruara dhe duke e kërcënuar se do t’i publikonte ose shpërndante ato.
I mituri ka pretenduar gjithashtu se gjatë kësaj periudhe kishte pasur raste të përsëritura abuzimi dhe se në disa episode ishte ushtruar edhe dhunë.
Pas denoncimit, policia greke ka nisur hetimet dhe ka sekuestruar telefonin e 17-vjeçarit. Pajisja do të ekzaminohet për të verifikuar nëse ekzistojnë materialet për të cilat ka folur 15-vjeçari dhe nëse ato lidhen me pretendimet e tij.
Ndërkohë, 17-vjeçari ka mohuar akuzat. Sipas versionit të tij, dy të miturit kishin marrëdhënie shoqërore dhe kontaktet mes tyre kishin qenë me pëlqim.
Autoritetet greke po vijojnë hetimet për të verifikuar dëshmitë dhe provat e mbledhura, ndërsa çështja mbetet nën hetim.
Discussion about this post