Lëvizja Socialiste për integrim, përmes nënkryetares Kejdi Mehmetaj ka denoncuar Policinë Bashkiake të Tiranës se po tejkalon kompetencat e saj duke “dërrmuar” me gjoba shoferët.
Nisur nga shifrat zyrtare, ku Policia bashkiake e Tiranës vetëm me shkakun e parkimit të gabuar ka vendosur rreth 330 mijë gjoba ndërsa Policia Rrugore rreth 60 mijë, Mehmetaj ironizon se me zellin e tyre, Policia Bashkiake ka kaluar kompetencat.
“Qytetarët e Tiranës prej kohësh po përballen me arrogancën e Policisë Bashkiake. Pas problemeve pa fund që bashkia u ka krijuar qytetarëve me trafikun duke i detyruar ata që të humbasin orë të tëra në trafikun e Tiranës, ku shpenzojnë para për karburantin dhe kohë, tani dërrmohen dhe me gjoba pa fund. Shifrat flasin vetë: Policia bashkiake e Tiranës vetëm me shkakun e parkimit të gabuar ka vendosur rreth 330 mijë gjoba ndërsa Policia Rrugore e cila siguron mbarëvatjen e trafikut dhe qarkullimit rrugor ka vendosur rreth 60 mijë. Pra, Policët e Erion Velisë që kanë një përgjegjësi të kufizuar lidhur me problemet e transportit rrugor dhe rregullimit të trafikut me ‘zellin e tyre’ të shfrenuar i kane goditur qytetarët shumë herë më tepër sesa Policia Rrugore, që është dhe autoriteti më i lartë i përgjegjësisë për qarkullimin rrugor në Tiranë dhe të gjithë vendin”, shprehet Mehmetaj.
Mehmetaj shton se ndonëse qytetarët po përballen me pasojat e jashtëzakonshme që la më parë pandemia dhe tani rritje e frikshme e çmimeve, i duhet që të përballet edhe me gjobat e bashkisë, për parkim të gabuar.
Gjithashtu, LSI i kërkon Bashkisë të përgjysmojë në mënyrë të menjëhershme tarifat e parkimit që aplikohen gjatë ditës për të mos vazhduar më tej, dhe kthyer Policinë Bashkiake në një trupë të urryer.
Discussion about this post