Zëdhënësja e Antikorrupsionit në Partinë Demokratike, Genta Vangjeli, ka reaguar ashpër ndaj promovimit të kandidatit të Partisë Socialiste për Bashkinë Cërrik, Florenc Doka, duke e akuzuar atë për konflikt të rëndë interesi dhe përfitim nga fondet publike gjatë kohës që mbante detyrë zyrtare në këtë bashki.
Reagimi i Vangjelit vjen pas deklaratës së ministrit Andis Salla, i cili e cilësoi Dokën si “njeriun e duhur” për zhvillimin e Cërrikut.
Zëdhënësja e PD-së solli fakte konkrete që, sipas saj, tregojnë përfitime private të Dokës ndërsa shërbente si Sekretar i Përgjithshëm i Bashkisë Cërrik, detyrë që e mbante paralelisht me pronësinë e kompanisë familjare.
- Kontrata Publike Për Kompaninë ‘Melius’ shpk:
- Kompania ‘Melius’ shpk, në pronësi të z. Doka, e regjistruar në vitin 2022, është kontraktuar nga Bashkia Cërrik (e drejtuar nga Andis Salla) për një sërë shërbimesh dhe mallrash.
- Këto përfshijnë blerje pajisjesh dhe orendish, organizim eventesh sociale, si dhe shërbime dhe mallra të tjera.
- Përdorimi i Asetit Publik me Çmim Qesharak:
- Në dhjetor 2023, Bashkia Cërrik zhvilloi një procedurë ankandi për Loti 2 – Dhënien në përdorim të fondit pyjor ‘Mollas’ (ngastra 52b), me sipërfaqe 5.0 ha.
- Fitues u shpall kompania në pronësi të Florenc Doka, për një vlerë kontrate prej vetëm 600 euro në vit.
Genta Vangjeli theksoi se ky ishte “vizion i shpallur për zhvillimin e Bashkisë Cërrik sipas Partisë Socialiste: përfitime private në emër të zhvillimit publik.”
Ajo i bëri thirrje qytetarëve të Cërrikut të reflektojnë nëse janë të gatshëm të përfaqësohen nga një person që ka përfituar fonde dhe asete publike për biznesin e tij privat, ndërsa po promovohet si “njeriu i duhur” për të drejtuar qytetin.
“Koha për përgjigje është më 9 Nëntor,” përfundoi Vangjeli, duke iu referuar datës së zgjedhjeve të pjesshme.
Discussion about this post