Sekretarja e përgjithshme e Partisë së Lirisë, Brunilda Haxhiu tha sot në një deklaratë për mediet, se bujqësia shqiptare ndodhet në krizën më të thellë në dekada.
Haxhi tha se bujqësia nuk është viktimë e fatit, por pasojë direkte e një modeli qeverisës të dështuar.
“Subvencionet jepen me vonesa, në mënyrë selektive dhe pa transparencë. Fermerët shqiptarë marrin disa herë më pak ndihmë sesa fermerët në Kosovë, Maqedoni, Serbi apo Greqi. Kostot e inputeve bujqësore janë të papërballueshme. Farërat, plehrat kimike, pesticidet, nafta dhe mekanika bujqësore janë kthyer në luks. Qeveria refuzon të ndërhyjë me politika të subvencionuara për furnizimin e tyre”, pohoi ajo.
“Fermeri shqiptar prodhon me kosto më të lartë se kudo në Evropë e Rajon. Sistemet e vaditjes janë të degraduara ose të zhdukura. Fushat përmbyten në dimër dhe thahen në verë. Fshatra të tëra janë të shkëputura nga tregu”, tha Haxhiu.
Sipas sekretares së përgjithshme të PL-së, “tregu është i dominuar nga monopole dhe mungesë pikash grumbullimi”.
“Sipas të dhënave të Shoqatës së Përpunuesve të Miellit, prodhimi i grurit të fermerëve mesatarisht në vit arrin 60,000 deri në 70,000 tonë grurë, kurse sasia e importuar arrin 250,000 deri në 300,000 ton grurë në vit. Burimet kryesore të importit ishin: Serbia dhe Rusia, që përbënin rreth 82% të totalit të grurit të importuar. Pra, Shqipëria mbetet shumë e varur nga importet e grurit. Pjesa dërrmuese e grurit të përdorur vjen nga vendet ballkanike (Serbi, Rusi, Ukrainë), ndërsa importet e grurit të fortë për prodhime si pasta kanë burime të ndryshme, kryesisht nga Kanada”, vijoi Haxhiu.
Haxhiu tha se “Partia e Lirisë është në krah të fermerëve të braktisur dhe ka prioritet të saj mbështetjen e bujqësisë me subvencione reale, pagesa direkte te fermeri, ulje e TVSH-së për prodhimet bujqësore”.
“Kredi të buta për investime në infrastrukturë, serra, magazinim dhe zinxhir prodhimi. Mbështetje financiare dhe lehtësira fiskale për të rinjtë që do të investojnë në zonat rurale. Shqipëria nuk ka nevojë për festime mashtruese mbi varrin e bujqësisë, por për një reformë të thellë dhe të ndershme që e sheh fermerin si aleat strategjik të zhvillimit ekonomik. Shqipëria ka nevojë për një qeveri që ka politika konkrete për të zhvilluar bujqësinë duke e kthyer në fuqi prodhuese dhe eksportuese”, tha Haxhiu, ndërsa theksoi se prioriteti më i madh i pesë prioriteteve të Partisë së Lirisë për katër milionë shqiptarë plus është e vetmja zgjidhje për fermerin dhe prodhimin shqiptar.
Discussion about this post