Rindërtimi pas tërmetit të vitit 2019 vazhdon të jetë një plagë e hapur për shumë qytetarë të Durrësit. Gjashtë vite pas tragjedisë, shumë familje nuk kanë hyrë ende në banesat e reja, ndërsa situata e tyre është rënduar edhe më tej nga humbja e bonusit të qirasë, të cilin nuk e marrin prej tre vitesh. Në këtë sfond, dyshimet janë ngritur se fondet e destinuara për rindërtimin janë kthyer në shpërblime për zyrtarët e Bashkisë dhe koordinatorët e Partisë Socialiste, të cilët dyshohet se kanë përfituar shuma marramendëse.
Një shembull konkret i kësaj situate është rasti i Gerald Gjergj Dautaj, koordinator i lagjes numër 10 i Partisë Socialiste. Ai denoncohet se ka përfituar 2.617.558 lekë, ose ndryshe 26 mijë euro, nga fondet e rindërtimit. Dautaj, i cili ka drejtuar më parë Ujësjellës Kanalizime Durrës, u largua nga detyra një vit më parë. Përfitimi i tij i grantit është bërë me vendim të Këshillit Bashkiak, ndërsa banesa e tij e dëmtuar është një apartament 2+1.
Rasti ka sjellë reagimin e ashpër të Degës së Partisë Demokratike Durrës, e cila ka theksuar se banesa e Dautajt, sipas tyre, nuk është dëmtuar nga tërmeti. “Një konfirmim i qartë i hendekut të krijuar, ku ca janë të nënës e ca të njerkës! A është kjo arsyeja pse Bashkia e Durrësit nuk ka pranuar kërkesën e PD për hetim për rindërtimin? Sa raste abuzimesh fshihen pas bllokimit të hetimit?”, shkroi dega e PD Durrës në rrjetet sociale.
Ky rast ngre pikëpyetje të mëdha mbi mënyrën se si po menaxhohen grantet e rindërtimit, duke lënë të kuptohet se ato po merren padrejtësisht nga individë që nuk janë prekur realisht nga tërmeti. Ndërkohë, mijëra qytetarë që u përballën me tmerrin e tërmetit të vitit 2019 dhe mbetën pa strehë, janë hedhur tashmë në rrugë, duke humbur shpresën për një zgjidhje të shpejtë dhe të drejtë të problemit të tyre të strehimit.
Situata kërkon një hetim të thelluar dhe transparent për të zbardhur të gjitha abuzimet e mundshme dhe për të garantuar që fondet e rindërtimit t’u shërbejnë vërtet atyre që u prekën nga fatkeqësia natyrore.
Discussion about this post