PD ka akuzuar kryetarin e Bashkisë Tiranë, Erion Veliaj se çmimet e tenderave për ndërtimin e shkollave në kryeqytet janë ndër më të shtrenjtët në Evropë.
Koordinatori i PD-së, Klevis Balliu në një deklaratë për mediat, tha se Veliaj ka vendosur të ndërtojë shkollën “Edit Durham” në Tiranë me 3388 euro për metër katror. Duke iu referuar dokumneteve të publikuara nga Agjencia e Prokurorimit Publik, ai theksoi se në total tenderi kap shifrën e 4.9 milionë eurove.
Në fund të deklaratës, Balliu shtoi se të gjitha këto skandale janë arsyeja për të vijuar protestat para Bashkisë Tiranë dhe bëri thirrje për pjesëmarrje të enjten e 22 gushtit në orën 11.
Denoncimi:
“Erion Veliaj me ardhjen në krye të bashkisë ka thyer rekorde ne abuzime dhe vjedhje. Pushteti aktual nuk investon në arsim por arsimin e sheh si mundësi për të vjedhur. Veliaj shpiku taksën e infrastrukturës arsimore me anë të së cilës do të ndërtoheshin shkolla të cilat nuk janë ndërtuar çka është abuzim me fondet e kësaj takse. Së dyti ato shkolla te cilat janë ndërtuar apo po projektohen për tu ndërtuar kanë shifra tejet të fryra që tejkalojnë edhe vendet më të zhvilluara evropiane“, e nisi deklaratën Balliu.
Më tej, foli për procedurën tenderuese për ndërtimin e shkollës.
“Bashkia Tiranë ka hapur një tender me vlerë 4.9 milion euro për ndërtimin e shkollës ‘Edit Durham’. Kjo shkollë ka një sipërfaqe totale 4440 metër katror, ku 2515 m2 janë sipërfaqe oborri dhe sipërfaqja e godinës mbetet 1460 metër katror“, tha Balliu.
Më tej, bëri një krahasim me çmimet e ndërtimit në qytetet më të zhvilluara europiane:
“Sipas raporteve zyrtare ndërkombëtare, metri katror për ndërtimin në Europë varion nga Parisi me 2.236 dollar metri katror, Amsterdam 2.373 dollar metri katror, Dublin 2696 dollar metri katror, Munih 3.343 dollar metri katror dhe Londra me e shtrenjta me 4.259 dollar për metër katror”.
‘Tirana e Veliajt është e dyta më e shtrenjta në ndërtimin e shkollave me 3388 euro për metër katror pavarësisht se ndryshe nga vendet e tjera, ne kemi rrogat më të ulëta, pensionet me të ulëta dhe standardin e jetesës më të ulët, ndihmën ekonomike më të ulët dhe ndotjen më të lartë, e çmimet qartazi më të shtrenjta se vendet më të zhvilluara në Europe. Partia Demokratike i bën thirrje institucioneve të drejtësisë të hetojë këto tendera abuzues që po vjedhin çdo qindarkë të taksave të qytetarëve. Të nderuar miq, duhet të bashkohemi në luftën për shpëtimin e Tiranës që të shpëtojë edhe xhepi juaj nga duart e Erion Veliaj“, përfundoi.
Discussion about this post