Kryebashkiaku i Vlorës Ermal Dredha është denoncuar nga një kompani se ka shkelur ligjin mbi ‘Prokurimet Publike’. Kjo ka lidhje me raportimin më datë 3 qershor 2024 nga Gijotina.com, ku publikoheshin shkeljet që përmban procedura e prokurimit me objekt ‘Blerje materiale elektrike (për ndriçimin publik dhe institucional)’, i zhvilluar nga Bashkia Vlorë. Për këtë janë vënë në dispozicion 130 milionë lekë, me të cilat do të furnizohen llamba rruge dhe kabllo të përmasave të ndryshme.
Data 3 maj 2024 ka qenë data e fundit për paraqitjen e ofertave dhe në të njëjtën ditë është kryer mbyllja e tenderit. Kjo për shkak se nga 3 oferta, dy prej tyre u skualifikuan që në fazën e parë me argumentin se nuk përmbushnin kriteret. Edhe pse firma SARK shpk kishte paraqitur ofertën më të ulët me vlerë 118 milionë lekë, 12 milionë lekë më lirë se fondi limit. Pavarësisht këtyre fakteve të rëndësishme, komisioni i vlerësimit të ofertave me aprovimin e Dredhës ia dhuroi këtë kontratë firmës “AA&P” sh.p.k, në pronësi të Zihni Halimit – 50% dhe Dashnor Hajdërajt.
Përveç se tenderi u dha pa garë për ofertën më të shtrenjtë, pas kërkimeve zbuluam se firma fituese nuk ka publikuar pasqyrat financiare për vitin 2023. Edhe ky është një rregull mjaft i rëndësishëm në çdo prokurim. Kujtojmë se tenderi është vlerësuar nga Open Data Albania me “Flamur të kuq” që është shenja treguese e riskut të korrupsionit.
Ankesa
Të gjitha këto shkelje që në evidentuam janë anashkaluar nga institucionet përgjegjëse, si Agjencia e Prokurimeve. Por ku ka zë nuk është pa gjë. Tani ky tender është ankimuar në një instancë më të lartë, në KPP. Ankesa është bërë nga firma “LUAR Bros”, e cila shkruan se “AA&P” SHPK nuk plotëson kriteret për t’u kualifikuar dhe jo më për të qenë fituese. Kompania ka ngritur pretendimi se fituesi ka qenë i paracaktuar me herët.
“Në datën 03.06.2024 pranë Komisionit të Prokurimit Publik, është administruar ankimi elektronik me nr. A/2024/4148 dhe me nr. protokolli 1405/2024 datë 03.06.2024 e operatorit ekonomik “LUAR Bros” SHPK.
Nga shqyrtimi paraprak i ankesës të sipërcituar, u konstatua se objekti i ankesës lidhet me vendimmarrjen e Komisionit të Vlerësimit të Ofertave mbi kualifikimin e ofertës së paraqitur nga operatori ekonomik “AA&P” SHPK. Gjithashtu, operatori ekonomik ankimues në ankesën e tij, kërkon që operatori ekonomik “Sark” SHPK të mbetet i skualifikuar”, thuhet në informacionin e KPP.
Konkretisht ankimuesi shprehet se firma fituese nuk përmbush tre kriteret e përmendur më poshtë.
“2.3.4 Në mënyrë që të krahasohet pajtueshmëria me specifikimet teknike dhe standardet e kërkuara, Operatori Ekonomik duhet të paraqesë: Katalogun/et ose fragmente të katalogut/ëve të prodhuesit/ve për mallrat objekt prokurimi ku të tregohen dhe të specifikohen qartë materialet që do të ofrohen.
2.3.5 Operatorët ekonomik pjesëmarrës në procedurën e prokurimit duhet të paraqesin autorizim prodhuesi ose autorizim nga distributori i autorizuar për mallrat e kërkuara objekt prokurimi.
3 2.3.6 Në mënyrë që të krahasohet pajtueshmëria me specifikimet teknike dhe standardet e kërkuara, operatorët ekonomike ofertues duhet të paraqesin mostrat e mallrave e hapjes së ofertave për zërat sipas preventivit”.
Këto fakte janë cituar për të mbështetur denoncimin. Ky është një nga ato tendera, që tregojnë mënyrën se si veprojnë zyrtarët për të favorizuar njërën apo tjetrën kompani. Kujtojmë se Dredha erdhi në pushtet duke zëvendësuar Dritan Lelin me premtime se do t’i priste rrugën korrupsionit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post