Ministrja e re e Shëndetësisë, Albana Koçiu po ecën në gjurmët e paraardhëses, Ogerta Manastirliu. Koçiu i zhvillon tenderët pa konkurrencë dhe për këtë denoncohet vazhdimisht në Komisionin e Prokurimeve Publike. Këtë herë bëhet fjala për tenderin me objekt “Shërbimi i trajtimit dhe asgjësimit të mbetjeve spitalore, për mbulimin e nevojave spitalore për një periudhë 36 mujore”, i cili kap një vlerë monetare të lartë nga fondet e Shëndetësisë, 8 miliardë lekë.
Tenderi ishte planifikuar të mbahej në prill të këtij viti dhe në atë muaj të shpallej fituesi.
Por, burokracitë dhe skemat abuzuese kishin krijuar një ngërç që nuk po zgjidhej.
“Më datë 20-03-2023, pranë Komisionit të Prokurimit Publik është administruar ankesa e operatorit ekonomik ECO EMPIRE SHPK dhe objekti i ankesës lidhet me Modifikim e dokumenteve të tenderit.
Më datë 10-04-2023, pranë Komisionit të Prokurimit Publik është administruar ankesa e operatorit ekonomik V.A.L.E. RECYCLING dhe objekti i ankesës lidhet me Modifikim e dokumenteve të tenderit”, thuhet në dokument.
Të dy firmat kanë bërë ankesë për të njëjtën pikë, modifikim dokumenti tek tenderi. Ka qenë firma ECO EMPIRE SHPK ajo që ka ngritur zërin e para, por KPP nuk e ka marrë parasysh. Është dashur ndërhyrja e një kompanie më pranë qeverisë që KPP të zgjohet.
Shohim se në prill është bërë denoncimi nga firma V.A.L.E. RECYCLING, në pronësi të Elvis Mirit. Në këtë denoncim ai pretendon se Ministria e Shëndetësisë ka bërë modifikime në tender dhe nuk i ka paraqitur ato në sistemin e prokurimeve, kjo gjë ka sjellë skualifikimin e të gjitha firmave pjesëmarrëse në tender.
Dhe më datë 16.08.2023, KPP i ka kërkuar Ministrisë që të mos vazhdojë më me hapat e mëtejshme të tenderit.
Dhe që nga bërja e ankesës, deri në nëntor KPP e ka shtyrë vendimin për ankesën e V.A.L.E. RECYCLING duke thënë se ministria po bënë korrigjimet e nevojshme.
Kjo nuk ka ndodhur pavarësisht ankesave, vetëm pas ndërhyrjes sërish të Elvis Mirit, KPP mori një vendim pasi ikën edhe muajt duke pritur Ministrinë e Shëndetësisë.
“Procesi i hartimit dhe publikimit të modifikimeve të dokumenteve të tenderit nga ana e anëtarëve të njësisë së prokurimit, shqyrtimi i ankesës nga ana e anëtarëve të Komisionit të Shqyrtimit të Ankesave për modifikimin e këtyre dokumenteve dhe mosveprimet e njësisë së prokurimit për zbatimin e vendimit të Komisionit të Shqyrtimit të Ankesave, është bërë jo në përputhje me legjislacionin për prokurimin publik për shkaqet e sipërcituara”, arsyeton KPP.
Në përfundim ankesa e Mirit pranohet dhe Ministria e Shëndetësisë urdhërohet të anulojë procedurat dhe të bëjë rregullimet e nevojshme.
Biznesmeni Elvis Miri njihet si oligarku i pastrimit, që ka shtrirë tentakulat e tij në sektorin e Shëndetësisë. Me datë 21 shkurt 2023 ai ka nënshkruar një kontratë me drejtoreshën e QSUT, Albana Fico. Bëhet fjalë për tenderin me numër reference REF-56714-01-24-2023 dhe objekt “Trajtimi i mbetjeve të rrezikshme spitalore anatomike të lëngëta dhe të ngurta, për QSUNT, për 12 muaj”.
Firma V.A.L.E. RECYCLING sh.p.k. e ELvis Mirit ka qenë e vetmja që ka paraqitur ofertë për këtë tender. Dhe pa e zgjatur shumë, duke anashkaluar rregullat për konkurrencë të drejtë, Fico e ka shpallur fitues këtë firmë.
Vlen të shtojmë se tenderët e pastrimit nga spitale Elvis Miri i ka marrë në shkelje të ligjit, për këtë cilësohet si oligarku i pastrimit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post