Pak ditë më parë Gijotina.com denoncoi tenderin gjigant të QSUT për mirëmbajtje pajisjesh, të ndarë në disa lote, ku secili prej tyre ishte i thurur pa pyetur për ligjin mbi prokurimet. Mes këtyre tenderave veçuam lotin 1 me objekt “Mirëmbajtje Pajisje mjekësore prodhues Philips /ose ekuivalent”, me Fond Limit për 24 muaj: 88, 858 534.38 Lekë (pa TVSH) ose 106 630 241.26 Lekë (me TVSH), apo afro 1 milion Euro.
Ky lot ishte hapur fillimisht më një vlerë më të ulët, rreth 700 milionë lekë në fund të vitit të kaluar dhe ishte anuluar më pas për shkak të shkeljeve që u konstatuan. Por, drejtoresha Albana Fico me këmbëngulje i ka qëndruar vendimit të saj.
Teksa ka vazhduar me lotet e tjera në fillim të këtij viti, Fico i është rikthyer edhe njëherë këtij loti, tani më me një rritje fondi prej 100 milionë lekësh.
Sërish me shkelje dhe me qëllime përvetësimi. Ndërkohë, firma “Health&Light” SHPK më datë 31 janar 2024 ka bërë një denoncim në Komisionin e Prokurimeve Publike për këtë tender. Firma në fjalë pretendon se Komisioni i Vlerësimit në QSUT e ka skualifikuar pa të drejtë, duke përmendur edhe disa nga pikat zyrtare të vendimit.
Gjetjet në dokument
Së pari, QSUT e ka skualifikuar këtë kompani pasi në ofertën e saj shkruhej që “pjesët e dëmtuara të pajisjeve që do të zëvendësohen me të reja, do të merren nga operatori që kryen shërbimin”. Deri diku me të drejtë komisioni shprehet se “Kjo është një procedurë për mirëmbajtjen e pajisjeve dhe nuk kanë lidhje me zhvendosjen dhe nuk është klauzolë e trashëguar nga një kontratë e mëparshme për këto pajisje”. Gjithsesi, për këto raste ligji i prokurimit kërkon që të bëhen sqarime dhe jo menjëherë të eliminohen ofertat.
Por, Fico dhe stafi i saj nuk e kanë marrë fare mundimin. Madje, si për të përforcuar planin e tyre që ky tender t’i jepej kompanisë së paracaktuar, në vendim thuhet se “Diferenca ndërmjet ofertës së renditur në vend të parë, dhe ofertës së renditur në vend të dytë, është 20 415 514 Lekë. Për këtë arsye, bazuar në Rregullat e Prokurimit Publik, miratuar me VKM nr. 285/2021, nuk është i mundur kalimi nga oferta e parë tek oferta vijuese”.
Në pamje të parë duket sikur janë marrë konsideratë ofertat më të lira, por kjo nuk do të thotë që ajo kompani të shpallet menjëherë fituese sepse ka ofertë më ekonomike. Duket e dyshimtë që kompania fituese ka ofruar më shumë se 200 milionë lekë më pak se sa fondi limit i shtuar pas rihapjes së tenderit.
Në fakt, edhe në këto momente që flasim, në QSUT ka mangësi të shumë pajisjeve të rëndësishme, të cilat nuk funksionojnë fare, edhe pse paguhen shuma të mëdha në mirëmbajtjen e tyre.
Mjekët apo përgjegjësit e reparteve ku mungojnë këto paisje kanë bërë herë pas herë shkresa ku informojnë drejtoreshën dhe ministren e Shëndetësisë për situatën, por puna e tyre mbaron tek tenderat.
Situata në spital është katastrofë për shkak të tenderave formalë ku përvetësohen fondet e mirëmbajtjes. Fico dhe Koçiu mbajnë përgjegjësi për dëmet që shkaktoi zjarri i rënë dy ditë më parë në urgjencën e QSUT. Ajo pjesë e godinës është ndërtuar së fundmi dhe gjithmonë ka patur probleme me linjën elektrike. Tani që i doli flaka, Fico deklaroi që është diçka normale. Si pasojë e kësaj situate “normale” shumë pacientë u asfiksuan dhe tashmë i kanë ‘ngjeshur’ nëpër dhoma të tjera.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post