Manipulohet tenderi i fletëve të votimit për zgjedhjet në Universitetin e Tiranës që do të zhvillohen më 21 qershor 2024. Përgatitjet e rektori Artan Hoxha për procesin zgjedhor përfshinin edhe prokurimin e prodhimit të fletëve të votimit, i cili ka përfunduar në KPP pas një denoncimi.
Nëse vërtetohen pretendimet e kompanisë që ankohet, do të ngrihet një pikëpyetje e madhe edhe për vetë zgjedhjet. Sa të besueshme dhe produktive do të jenë këto zgjedhje kur organizatori bën shkelje ligjore apo ndërton skema abuzimi me fondin e caktuar. Sigurisht që me tenderin nuk merret Profesor Hoxha, pasi financat i drejton administratori Skerdi Dafa, por zgjedhjet kanë si autoritet kryesor rektorin.
Më datë 10 maj 2024, Universiteti i Tiranës ka zhvilluar një tender me numër reference Nr. REF-02891-04-29-2024, me objekt: “Blerje fletë votimi për zgjedhjet e autoriteteve drejtuese të UT”.
26 milionë lekë janë vënë në dispozicion për prodhimin e fletëve të votimit. Por prokurimi për momentin ka mbetur pezull nga një denoncim i bërë në KPP që tregon se fituese e përkohshme e kësaj kontrate është firma “Albdesign PSP” SHPK, në pronësi të Elvis Sulës.
Ky është një emër i njohur pasi ka qenë edhe “pronar” i kompanisë “AGI KONS”, e cila në fakt është themeluar nga Gentian Sula. Por pasi ky i fundit u denoncua disa herë për pazaret me kryetarin e bashkisë Erion Veliajn, i kaloi aksionet për një periudhë kohe tek Elvis Sula.
Kompania “Agi Kons” ka në pronësi të saj rezidencën “Kodra e Diellit 2”, pikërisht ku banon kryetari i Bashkisë Tiranë, Erion Veliaj, i cili ia ka blerë shtëpinë Gentian Sulës. Në këtë rezidencë strehohen politikanë, VIP-a e persona të tjerë me pushtet, ku kanë çdo shërbime ndryshe nga pjesa tjetër e qytetit, ku jetojnë taksapaguesit e thjeshtë.
Pasi “AGI KONS” u kthye sërish në duart e Gentian Sulës, Elvisi menaxhon firmat e tij, ku njëra është “Albdesign PSP” SHPK.
Në denoncimin e bërë nga “Inpress” SHPK pretendohet se “Albdesign PSP” SHPK ka paraqitur ofertë anomalisht të ulët dhe nuk ka dorëzuar certifikata për punonjësit e specializuar që kërkohen në tender.
Nëse oferta është anomalisht e ulët, kjo vërtetohet poa vështirësi se pse ligji ka përkufizuar që “Në rastin kur janë të vlefshme dy ose më pak oferta (në përputhje me nenin 56 të LPP-së) ajo vlerësohet anomalisht e ulët kur shifra është më pak se 25% e fondit limit të përllogaritur.
“Ne rastin konkret, oferta ekonomike e paraqitur nga OE Albdesign PSP shpk është më e ulët se 25% e fondit limit të përllogaritur. Nga ana tjetër, është e vërtetë që në këtë fazë të procedurës prokuruese (pas vlerësimit të KVO të AK) ofertat e vlefshme rezultojnë të jenë paraqitur nga 3 (tre) operatorë ekonomikë pjesëmarrës, si dhe është e vërtetë gjithashtu, që bazuar në këtë vlerësim paraprak të KVO të AK, oferta ekonomike e OE Albdesign PSP shp. Nuk konsiderohet anomalisht e ulët, në zbatim të nenit 93 të LPP-së, dhe nenit 82 të Rregullave të Prokurimit Publik”, thuhet në ankesë.
Më tutje, në këtë dokument theksohet se UT në fazën finale ka lënë përballë OE “Albdesign PSP” shpk firmën “Filara” shpk., e cila nuk përmbush kriteret teknike dhe ligjore. Pra, duhej të ishte përjashtuar që në fazën e parë dhe jo të vendosej fiktivisht përballë firmës “Albdesign” PSP shpk, që me siguri ishte paracaktuar si fituese.
Nëse është kështu, ky është një tender fasadë me fitues të vendosur qysh më parë. Është e qartë se pushteti i oligarkut Sula i ka bërë hije organizatorëve të tenderit të fletëve të votimit. Megjithatë, mbetet e paqartë se cila do të jetë ndërhyrja e KPP dhe kur do të ndodhë kjo, pasi zgjedhjet universitare po afrojnë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post