Një 47-vjeçare, e cila ka bashkëpunuar me Policinë italiane për të shkatërruar një grup prostitucioni është vetëvrarë, pasi i është refuzuar nënshtetësia italiane. “Ilgiorno” shkruan se Adelina Sejdini në vitin 1996 denoncoi në Polici tutorët e saj, të cilët e shfrytëzuan për vite me radhë në Itali.
Ajo për vite me radhë kishte kërkuar statusin e refugjatit në Itali, por që gjithmonë i është refuzuar. Ndërkohë që disa ditë para se të vriste veten duke u hedhur para një hekurudhe, ajo u dogji veten me benzinë para Ministrisë së Brendshme, në mënyrë që të tërhiqte vëmendjen e qeverisë. Ajo u transportua në spitalin Santo Spirito me djegie të rënda, ku më pas edhe u shërua.
Pas largimit nga spitali, 47-vjeçarja u përpoq të shkonte dhe të kërkonte ndihmë nga Presidenti i Republikës Sergio Mattarella. Me një mikrofon në shesh ajo tregoi për lejen e saj të qëndrimit, por policia ndërhyri dhe e largoi Adelinan duke i dërguar asaj një masë dëbimi nga Bashkia e Romës dhe ndalimin për t’u kthyer për një vit.
Më herët ajo ishte shprehur se shteti italian i kishte premtuar mbrojtje kur denoncoi tutorët, por kjo nuk ndodhi.
“Shteti italian, shumë vite më parë, më bindi të denoncoj tutorët, më premtuan mbrojtje. Unë kërkoj një minimum e të drejtave sepse prej shumë vitesh kam luftuar për të ndihmuar të gjitha viktimat e trafikimit, kërkoj të më jepet nënshtetësia italiane”, ishte shprehur ajo.
Kohët e fundit, Adelina Sejdini ishte diagnostikuar me kancer, por pavarësisht gjendjes jo të mirë shëndetësore, nuk i ndali përpjekjet, duke shkuar shpesh në Romë.
E ndjera vendosi t’i japë fund jo vetëm këtyre përpjekjeve, por dhe jetës së saj, duke u hedhur nga një urë hekurudhore.
Discussion about this post